Астанадағы Қайрат Перизат пен оның анасы Ғайни Алашбаеваға қатысты қылмыстық іс бойынша сот процесінде жаңа мәліметтер жарияланды. Сот отырысында мемлекеттік айыптаушы Алашбаеваның жеке телефонынан табылған жазбаларды оқып берді. Онда миллиондап жазылған жеке мақсаттар мен жоспарлар көрсетілген,деп хабарлайды Todayinfo.
Прокурордың айтуынша, бұл жазбалар жалған қайырымдылық арқылы жиналған қаражаттың қандай мақсатта жұмсалғанын немесе жұмсалмақ болғанын айғақтайды.
Телефондағы «армандар тізімі» төмендегідей:
- 37 000 000 теңге – көлік алу
- 5 000 000 теңге – тіс емдету
- 10 000 000 теңге – Түркияда емделу
- 3 000 000 теңге – БАД (биологиялық белсенді қоспалар) сатып алып ішу
- 10 000 000 теңге – қыдыру
- 3 000 000 теңге – фэншуй
- 1 000 000 теңге – бацзы курсы (қытай астрологиясы)
- 2 000 000 теңге – оффлайн қыдыру
- 3 000 000 теңге – киім алу
- 3 000 000 теңге – ақ алтыннан жасалған бриллиант білезік
«Бұл жазбалар олардың қаражатты мақсатсыз және жеке қажеттіліктеріне жұмсағанын көрсетеді. Яғни, қайырымдылық қорына түскен ақшаның халыққа емес, өзінің «армандарына» қызмет еткенін байқаймыз», – деді прокурор жарыссөз кезінде.
Бұған дейін тергеу қорытындысы бойынша, Перизат Қайрат пен оның анасы «BizBirgemiz Qazaqstan 2030» атты қоғамдық қор арқылы 3,5 миллиард теңге көлемінде қаржы жинап, оны өз пайдасына жаратқан деген күдікке ілінген болатын.
