Фото: коллаж Todayinfo
Әлеуметік желіде MeirTas компаниясының басшысы Мұсабеков Мейірбек видеожазба жариялап, Шығыс Қазақстан облысы, Тарбағатай ауданы, Шілікті ауылдық округінің тұрғындары мен әкімдігіне шағымданды, деп хабарлайды Todayinfo.kz ақпарат агенттігі.
Ол өзінің еңбекақысын ала алмай жүргенін, сондай-ақ мердігер ретінде орындаған жұмысына тапсырыс берушілер жауап бермей отырғанын айтты.
Мейірбектің сөзінше, ол Астанадан шақыртылып, белгілі бір құлпытас пен мүсіндерді жасауға келісімге келген. Алғашқы келісім-шарт бойынша жұмыс құны — 7,5 миллион теңге болған, оған жоғары сапалы тастар Ресейдің Челябі қаласынан әкелініп, орнатылған. Тапсырыс берушілердің бірі — Егеубаев Айдын, тағы бірі — Мақсат Ысқақов деген азаматтар болғаны айтылды.
«Бастапқыда 7,5 млн-ға келіскенбіз. Маған алдын-ала 500 мың төледі. 19-ына дейін барлығын орнатып берсең болды деп айтты. Олар: “халықтан жинап берем ақшаны” деп сендірді. Енді маған иттік жасап отыр — 20 күн болды, артынан жүгіріп жүрмін, телефон көтермейді. Тасыңды бұзып алып кете бер дейді», — дейді Мұсабеков видеода.
Басшының айтуынша, халықтан осы ескерткішке 2 255 000 теңге жиналған. Сонымен қатар, Мақсат Ысқақов та 2,5 миллион теңге берген делінеді. Алайда, өзіне төленетін қалған қаражаттың қайда кеткені белгісіз болып тұр.
Мейірбек видеода ауыл ақсақалдарына, ел ағаларына жүгінгенін, жағдайды бейбіт жолмен шешуге тырысып жатқанын, бірақ ақшасын қайтармаса тасты манипулятор жалдап алып кетуге мәжбүр болатынын айтты.
Видео жарияланғаннан кейін желі қолданушыларының пікірі екіге бөлінді. Көпшілік кәсіпкердің еңбегі бағалануы тиіс екенін айтып, оны қолдап жатыр:
«Адал еңбекті жеуге болмайды!»
«Астанадан келіп, тасты әкелген адамға осылай жасау — ұят!»
«Әкімдік бұл іске аралассын. Әділет болу керек!»
Бірақ кей пікір иелері жағдайды екі тараптың уәжі толық тыңдалмай тұрып бағаламауға шақырды.
Қазіргі уақытта бұл жағдай қоғамда кең талқыланып, әділдік іздеген кәсіпкерлер мен ауыл тұрғындарының проблемасын ашып көрсеткен кезекті мысалға айналды.
Посмотреть эту публикацию в Instagram
