Фото: NDTV
Бангладеш астанасы Даккада әскери оқу ұшағы мектеп пен колледждің кампусына құлап, кемінде 19 адамның өмірі қиылды. Ұшақ мектепке құлағанда ғимарат ішінде балалар болған, деп хабарлайды Todayinfo агенттігі NDTV-ға сілтеме жасап.
F-7 BGI үлгісіндегі оқу ұшағы Дакканың Уттара ауданындағы Майлстоун мектебі мен колледжінің аумағына құлаған. Куәгерлердің айтуынша, апат кезінде оқу орнында балалар болған. Апат салдарынан жарылыс болып, мектеп бірден өртке оранған.
Бангладеш армиясының ресми өкілдері құлаған ұшақтың әскери әуе күштеріне тиесілі екенін растады. Өрт сөндіру және азаматтық қорғаныс қызметінің өкілі Шахджахан Шикдер 19 адамның қаза тапқанын мәлімдеген. Оның ішінде 16 оқушы мен екі мұғалім мектепте мерт болған.
Алайда елдің денсаулық сақтау министрлігінің арнайы кеңесшісі Сайедур Рахман 100-150 адамның түрлі жарақат алғанын жеткізді. Ұшақты басқарған авиация лейтенанты Товкир Ислам Сагар ауыр жарақат алып, Біріккен әскери госпитальдің жансақтау бөліміне жеткізілген, кейінірек қайтыс болып кетті.
Бангладеш үкіметі 22 шілде – сейсенбі күні ел бойынша бір күндік ұлттық аза тұту жариялады. Апаттың нақты себептері әзірге ресми түрде хабарланған жоқ. Ұшақтың қалай құлап, жарылғаны жайлы видео толықтай камераға жазылып қалған.
