Еуроодақтың Украинадағы соғысқа байланысты енгізген 16-шы санкциялар пакетіндегі тізімге Қазақстанның екі компаниясы енді. Олардың бірі бұған дейін АҚШ пен Ұлыбританияның экономикалық шектеулеріне іліккен, деп хабарлайды Todayinfo.kz.
«Kazstanex» компаниясына қатысты санкциялар
Алматыда тіркелген «Kazstanex» ЖШС Еуроодақтың жаңартылған санкциялық тізімінде 738-ші орынға енгізілді. Бұл компания өткен жылдың қазан айында АҚШ Қаржы министрлігінің санкциясына іліккен. Америкалық биліктің мәліметінше, «Kazstanex» Батыс елдерінің өндірістік жабдықтарын Ресейге жөнелткен.
АҚШ-тың санкцияларынан кейін бірнеше күн өткен соң, Ұлыбритания да бұл компанияға экономикалық шектеулер енгізді. Ағылшын билігі компанияны:
«Украинаның тұрақтылығына қауіп төндіруі мүмкін экономикалық ресурстарды, тауарларды немесе технологияларды ұсынды»
деген тұжырыммен санкциялық тізімге қосты.
«Metallstan» компаниясы да санкцияға ілікті
«Kazstanex» компаниясымен бір топқа кіретін тағы бір алматылық фирма – «Metallstan» ЖШС. Бұл компания да ЕО-ның 16-шы санкциялық пакетіндегі тізімге енгізілді.
Бұл екі компанияның санкцияға ілігуі Қазақстанның сыртқы саудасы мен экономикалық байланыстарына қалай әсер ететіні әзірге белгісіз. Алайда Қазақстан билігі санкциялық талаптарды орындау және өз компанияларының заңсыз әрекеттеріне жол бермеу мақсатында халықаралық нормаларды сақтауға шақырған болатын.
