Бүгін Премьер-министрдің орынбасары Ермек Көшербаев облысымызға жұмыс сапарымен келіп, Абайдың 180 жылдық мерейтойының дайындығын тексерді. Бұл туралы Абай облысының әкімі Берік Уәли айтты,деп хабарлайды Todayinfo.
«Мерейтой аясындағы негізгі іс-шаралар өтетін орынның бірі – Абай ауданының орталығы Қарауылдың іргесіндегі Қарауылтөбе. Осы жерде мерейтойға дайындық туралы баяндадым. Қарауылтөбеде 400 көрерменге арналған үлкен дала сахнасы, киіз үйлер қалашығы, кәсіпкерлерге арналған 2500 шаршы метрлік сауда аймағы, сонымен қатар жарық, су, кәріз желілері мен санитария инфрақұрылымы қарастырылған»,- деді ол.
Қазір той өтетін жердегі ішкі жолдар жасалып жатыр. Бұл жерде 184 киіз үй орнатылады. Арнайы жабдықталған дәретханалар қойылып, электр желісі тартылып, жарық шамдары орнатылды. Ал Абай саябағында еліміздің әр облысының көрме киіз үйлері мен өңіріміздің он ауданының, жалпы саны отыз киіз үй тігіледі. Тағы бір жаңалық, осы мерейтой қарсаңында Жидебай музей-қорығы аумағында интернет желісі іске қосылды. Антенналық матчты құрылғы бүгін Бөрілі елді-мекеніне қойылды.
«Ермек Беделбайұлы Қарауыл ауылындағы Абай саябағында да болды. Қазір мұнда абаттандыру және көгалдандыру жұмыстары жүргізіліп жатыр. Мерейтой аясында осы саябақта республикалық «Жеті қазына» фестивалінің ашылу салтанаты өтеді.Бұдан кейін Үкімет басшысының орынбасары «Абай-Шәкәрім» мемориалдық кешенінде атқарылып жатқан қалпына келтіру жұмыстарының барысымен танысты.Ермек Көшербаев Абай ауданындағы мерейтойға дайындық шараларына оң бағасын беріп, қалған жұмысты сапалы және белгіленген мерзімде аяқтауды тапсырды»,- деді ол.
