Мәжіліс кулуарында журналистер сұрағына жауап берген Қорғаныс министрінің орынбасары Шайх-Хасан Жазықбаев 2024 жылы мерзімді әскери қызметте болған сарбаздар арасындағы суицид жағдайлары туралы мәлімет берді, деп хабарлайды Тodayinfo ақпараттық порталы.
Жазықбаевтың айтуынша, мерзімді әскери қызметшілер арасындағы өлім-жітім көрсеткіші азайған. 2024 жылы үш сарбаздың суицид жасағаны тіркелген, ал әлеуметтік желіде тараған «270 сарбаз суицид жасады» деген ақпаратты ол жалған деп атады.
«Қазір менің қолымда нақты мәліметтер жоқ, бірақ 2024 жылы мерзімді әскери қызметшілер арасында үш суицид жағдайы болды. Ал әлеуметтік желіде айтылған 270 деген сан шындыққа жанаспайды», – деді Шайх-Хасан Жазықбаев.
Жазықбаев мерзімді әскерде орын алған әрбір өлім-жітімге қатысты жауапты тұлғалар Қорғаныс министрлігінің бұйрығына сәйкес жазаланатынын атап өтті. Ол мерзімді қызмет сарбаздарының өлімі туралы статистиканың бұрмаланғанын алға тартып, келісімшартпен қызмет етіп жүрген әскерилер арасындағы суицидке қатысты қолында нақты деректердің жоқ екенін айтты.
«Осы оқиғаларға байланысты өзім де ескерту алдым», – деді министрдің орынбасары.
Шайх-Хасан Жазықбаев сарбаздар арасындағы жағдайды тұрақтандыру бағытында жұмыстар жүргізіліп жатқанын атап өтті. Оның сөзінше, 2020 жылдан бастап мерзімді әскери қызметтегі сарбаздар саны 12 мыңға дейін артқанымен, өлім-жітім көрсеткіші азайған.
