Алматыда «Жасыл ел» жастар еңбек жасақтарының жаңа еңбек маусымының салтанатты ашылуы өтті. Іс-шара Алматы қаласы Жастар саясаты басқармасының қолдауымен және Алматы қаласы «Жасыл ел» қалалық штабының ұйымдастыруымен өтті, деп хабарлайды Todayinfo.
Жобаның негізгі мақсаты – Алматы қаласының жастарын көгалдандыру және абаттандыру жұмыстарына тарту арқылы уақытша еңбекпен қамту, экологиялық сананы қалыптастыру және патриоттық рухты дамыту.
2025 жылғы еңбек маусымы аясында 2100 жас уақытша жұмыспен қамтылады деп жоспарлануда. Қазіргі таңда олардың ішінде 1266 жас жұмысқа кірісіп үлгерді. Жастар қаладағы саябақтарда, скверлерде, өзен жағалауларында және басқа да қоғамдық кеңістіктерде көгалдандыру, тазалау және абаттандыру жұмыстарымен айналысуда.
Салтанатты ашылу рәсіміне мемлекеттік және қоғам қайраткерлері, жастар ұйымдарының көшбасшылары мен белсенді жастар қатысты. Құрметті қонақтар қатарында Алматы қаласы Жастар саясаты басқармасының басшысы Кажденбек Азиз, танымал эколог Скакова Айжан, «Жасыл ел» республикалық штабының төрағасы Нұрасыл Жасұланұлы, қоғамдық кеңес мүшелері, үкіметтік емес ұйымдардың өкілдері және жастар қозғалыстарының мүшелері болды.
Сонымен қатар, жоба аясында Алматы қаласының 5 жетекші жоғары оқу орны мен экологиялық бағыттағы серіктес ұйымдар тартылып, жастарды жұмыспен қамту бойынша бірлескен жұмыс белсенді түрде жүргізілуде. Бұл серіктестік жастардың экологиялық мәдениетін арттыруға және олардың тәжірибелік дағдыларын дамытуға бағытталған.
Іс-шара аясында мерекелік концерттік бағдарлама ұйымдастырылды. Қатысушыларға ерекше көңіл күй сыйлаған отандық танымал орындаушылар Думан Марат пен ADIL өз өнерлерін көрсетті.
Жобаның қатысушысы, «Жасыл ел» қатарында үшінші жыл жұмыс істеп жүрген студент Олжабай Мерей өз әсерімен бөлісті:
«Жасыл ел – бұл жай ғана көгалдандыру жұмысы емес, бұл – жауапкершілік, достық пен даму мектебі. Әр маусым мен үшін туған қалама үлес қосуға, жаңа адамдармен танысып, өз еңбегімнің маңыздылығын сезінуге үлкен мүмкіндік», – деді ол.
2004 жылдан бастап жүзеге асырылып келе жатқан «Жасыл ел» бағдарламасы бүгінде Қазақстандағы ең ірі экологиялық-еңбек жастар жобаларының біріне айналды. Алматы қаласында бұл бағдарлама жыл сайын мыңдаған жасты біріктіріп, олардың еңбекке, патриотизмге және экологиялық мәдениетке деген көзқарасын қалыптастыруда маңызды рөл атқарып келеді.
