Қызылорда облысында балалар мен жасөспірімдер арасында суицидтік мінез-құлықтың алдын алу мақсатында Қазақстан Республикасы Үкіметінің 2023 жылғы 31 тамыздағы №748 қаулысына сәйкес кешенді салааралық жоспар жүзеге асырылып жатыр. Қызылорда облысының білім басқармасының психологиялық қолдау орталығы Todayinfo.kz ақпарат агенттігінің сауалына берген жауапта облыста атқарылған жұмыстар жайлы баяндады.
Аталған жоспар 2023–2025 жылдар аралығын қамтып, білім беру ұйымдарында психологиялық қызметті жүйелеу, ата-аналармен және қоғаммен байланысты нығайту, диагностика мен жедел көмек көрсету механизмдерін енгізуді көздейді.
Облыс бойынша балабақшалар, мектептер мен колледждерде 628 педагог-психолог қызмет атқарады. Бұл көрсеткіш штаттық бірлікке сай келеді және өңірдегі барлық білім беру ұйымдарын қамтиды. Орта білім беру ұйымдарында қызмет ететін мамандар психологиялық-педагогикалық қолдауды жаңа ережеге (ҚР Оқу-ағарту министрінің 2025 жылғы 29 сәуірдегі №92 бұйрығы) сәйкес жүзеге асырады.
Психологиялық қызметтің негізгі бағыты – балалардың мінез-құлқындағы ауытқуларды, күйзелістік және депрессиялық жағдайларды ерте анықтау. Осы мақсатта 11–17 жас аралығындағы оқушыларға жыл сайын арнайы психометриялық сауалнамалар (DASS, Ковач шкаласы, НСВ-10) жүргізіледі. Бұл әдістердің көмегімен суицидке бейім, эмоционалды тұрақсыз немесе жоғары стресс жағдайындағы балалар анықталып, олардың ата-аналарымен және медициналық мамандармен бірлесе кешенді көмек көрсетіледі.
«2025 жылдың ақпан айында жүргізілген мониторинг нәтижесінде 419 жасөспірім дәрігерлік кеңеске жіберілген. Оның ішінде 241-і жалпы тәжірибелік дәрігер кеңесін алса, 221-і психиатр кеңесіне жүгінген. Диагностика қорытындысы бойынша 110 балаға арнайы емдік шаралар тағайындалып, 22 жасөспірім стационарлық ем қабылдаған. Бұл – жүйелі түрде жүзеге асырылып жатқан диагностикалық және емдік бағыттағы жұмыстың нәтижесі екенін көрсетеді», — делінген хабарламада.
Сонымен қатар, Қызылордада өңірлік мобильді топтар құрылып, шұғыл психологиялық көмек көрсету жүйесі жолға қойылған. Бұл топтар ҚР Оқу-ағарту министрлігі мен Денсаулық сақтау министрлігінің бірлескен бұйрығына сәйкес әрекет етеді. Білім беру ұйымдарында QR-кодпен жабдықталған сенім телефондары, ақпараттық бұрыштар мен психологтар кеңесі қолжетімді форматта ұсынылған.
Балалар мен жастарға арналған Call орталықтар мен сенім телефондары тәулік бойы жұмыс істейді. Мысалы, 111 ұлттық сенім телефоны, 8-800-080-64-90 облыстық психологиялық қолдау орталығы, сондай-ақ жастар денсаулығы орталығының байланыс желісі жастарға көмек көрсетуге бағытталған.
Мұның барлығы Қызылорда облысында балалар мен жасөспірімдердің өмірі мен қауіпсіздігін қамтамасыз етудегі жүйелі және ғылыми негізделген тәсілдер арқылы атқарылып жатқан жұмыстардың ауқымдылығын көрсетеді.
