Астанада 5 сәуірде өтуі тиіс кәсіпқой бокс кеші басталмай жатып дауға ұласты. Танымал промоутерлік компания көрермендерді алдаған. Көрермендер жарнамасы жер жарған соң қымбат билеттерді сатып алған. Алайда, бокс кеші жақындағанда атақты спортшылардың шаршы алаңға шықпайтыны белгілі болды, деп хабарлайды Todayinfo ақпараттық агенттігі.
«Балауса Мұздыман америкалық азулы боксшы Розалинда Родригеспен (14-0, 3 КО) жұдырықтасуы тиіс болған. Алайда, оның орнына өз елінің шекарасынан шығып көрмеген бір филиппиндік қыз келетін болыпты. Балауса ондай боксшылардың алтауын ұрып құлатқан бұған дейін.
Сондай-ақ, Махмұд Сабырханның да қарсыласы келмейтін болыпты. Оған әлі қарсылас табылмаған. Ертең Тайландтан немесе тағы сол Филиппиннен «пляж» тазалап жүрген біреуді әкеле салады-ау деп болжап отырмын.
Дәл осы қарқынмен кете берсе 5 сәуір жақындағанда Жәнібектің қарсыласы да келмей қала ма деп алаңдап отырмын.
Кәсіби бокс кеші емес, нағыз қазақи бизнес болды бұл да. Nomad Promotions деген компания екен ұйымдастырып жатқан. 250 мың теңгелік билеттер сатып, жанкүйерлерді осылай алдап кетті. Мен Балауса мен Розалинданың жекпе-жегін күткен едім», — деп жазды журналист Серғали Балажан.
