Мемлекет басшысы 2025 жылды «Жұмысшы мамандықтар жылы» деп жариялаған болатын. Осыған орай индустриалды аймақ Қарағанды өңірі жаңа бастаманы қолға алды, деп хабарлайды Todayinfo.kz.
Өлкенің еңбек нарығының жартысына жуығын жұмысшы мамандар құрайды екен. Бұл – тау-кен және өңдеу өнеркәсібінде, тұрғын үй коммуналды шаруашылығында, құрылыс, ауыл шаруашылығы т.б. салаларда жұмыс істейтін 300 мыңға жуық маман.Қарағанды өзінің республиканың индустриалды орталығы екенін мақтан тұтады. Сондықтан оның алдағы уақытта ел аумағындағы жұмысшы мамандарды дайындау орталығына айналуы қисынды.Сондықтан біз алдымызға үлкен мақсат қойдық. Ол – кәсіптік-техникалық колледждерде білім беру сапасын халықаралық стандарттарға жеткізу. Бұл үшін Қытай, Германия, Түркия, Финляндия сияқты елдердің оқу орындарымен және компанияларымен тәжірибе алмасуды жолға қоямыз, — дейді Қарағанды облысы әкімінің орынбасары Әлібек Әлденей.
Индустриалды өлкеде жалпы саны 52 колледж бар екен. Қазір барлық колледждердегі білім беру жүйесін кластерлеуді қолға алынған көрінеді. Яғни, олардың әрқайсысы білім беру, құрылыс, энергетика, IT және байланыс, тау-кен өнеркәсібі, жеңіл өнеркәсіп, машина жасау, ауыл шаруашылығы сияқты сегіз бағыт бойынша кәсіби маман дайындауға бейімделеді.
Бұған қоса, Теміртау мен Қарағандыдағы екі политехникалық колледжді халықаралық аккредиттеуден өткізуге ниеттіміз. Тағы бір жақсы жаңалық – колледждегі оқу жүйесі кәсіпорындардағы практикалық сабақтармен ұштастырылады. Яғни, студенттер теориялық біліммен қатар өндірістегі кәсіпқой мамандардан мастер-класс алып, тәлімгер атанады.Айта берсек жаңалық көп. Айтпақшы, биыл колледждерге арналған гранттар санын 1100-ге арттырдық, яғни биылдың өзінде студенттер саны 9200-ге жетті. Бастысы, біздің мамандар ұлттық экономиканың тасын өрге домалататын нағыз кәсіпқой болуға тиіс. Адал еңбегімен елдің берекесін арттыратын мамандарға мемлекет тарапынан жан-жақты қолдау беріледі. «Еңбек түбі – береке» деген мәтел өмір шындығына айналуы керек, — дейді әкімнің орынбасары.
