Қазақстан Республикасы Мәдениет және ақпарат министрі Аида Балаева ведомстволық мекемелерде жүргізілген талдау нәтижесінде бірнеше заңбұзушылықтар мен жүйелі мәселелердің анықталғанын айтты. Бұл туралы ол «Айқын» газетіне берген сұхбатында айтқан,деп хабарлайды Todayinfo.
Министрдің сөзінше, жуырда 71 ведомстволық ұйымның қызметкерлерін «Бірыңғай кадрлық ақпараттық жүйеге» қосу кезінде саладағы 1 500-ге жуық қызметкердің бірнеше мекемеде қатар жұмыс істейтіні, тіпті кейбірі бес айлық көлемінде жалақы алатыны белгілі болған.
«Басқа қалада немесе шетелде тұрақты жұмысы бола тұра, біздің мәдени мекемелердің штатында сырттай тіркеліп, ай сайын жалақы алып отырғандар да анықталды. Бұл мәселені міндетті түрде реттейміз», – деді Аида Балаева.
Сонымен қатар, 1 200-ге жуық зейнеткер (арасында 90 жасқа дейінгі азаматтар бар) мәдени мекемелерде түрлі лауазымдарды атқарып жүргені белгілі болды. Министр бұл көрсеткіштердің басқару мен кадрлық саясаттағы кемшіліктерді көрсететінін айтып, нақты көрсеткіштер мен KPI арқылы есеп беру жүйесі енгізіліп жатқанын атап өтті.
«Басшы – тек іс-шара өткізіп, есеп беретін адам емес. Ол – ұйымның дамуын айқындайтын негізгі тұлға. Қазір мерекелік шаралардан гөрі, тұрақты әрі мазмұнды жобалармен айналысатын уақыт келді», — деді министр.
Аида Балаеваның айтуынша, мәдениет ұйымдарының басшылары тек шығармашылық емес, бюджет, жоспарлау, ғимараттың техникалық жай-күйі, кадр саясаты, материалдық база сияқты маңызды бағыттарға толық жауап беруі тиіс.
