Фото: Денис Кривошеев
«Қазақтелеком» компаниясының бірқатар қызметкері әлеуметтік желілер мен мессенджерлер арқылы өздерінің наразылықтарын білдіріп, басшылық тарапынан әділетсіз шешімдер қабылданып жатқанын мәлімдеді, деп хабарлайды Todayinfo.kz ақпарат порталы.
Денис Кривошеев жариялаған хатта қызметкерлер компаниядағы жағдайды «әділетсіздік пен бассыздық» деп бағалап отыр.
Хатта келтірілген мәліметке сүйенсек, компанияның басқарушы директорларының бірі — кадрлар жөніндегі басқарушы директор, басқарма мүшесі Б. (аты-жөні әдейі жасырылған) бір жылға жетпейтін уақыт ішінде 50,5 миллион теңге табыс алған. Соның ішінде соңғы 22 миллион теңге — «EBITDA көрсеткішіне қол жеткізгені үшін» сыйақы ретінде төленген.
Ал қарапайым қызметкерлер 20–30 жылдық еңбек өтілімен 120–160 мың теңге көлемінде ғана жалақы алып отыр. Монтерлердің айлығы екі есе аз, ал кейбір жағдайларда бұл еңбекақы аула сыпырушылардан да төмен. «Қызметкерлер денсаулығын, жастығын компанияға арнағанымен, олардың еңбегі лайықты бағаланбайды» делінген хатта.
Компания қызметкерлері Б. ханымның ұжымға менсінбеушілікпен қарайтынын, ал бір видеоконференция кезінде тікелей эфирде кеңседе темекі шеккенін алға тартады. Бұл әрекет өрескел еңбек және корпоративтік этика нормаларына қайшы екендігі айтылған.
Хат авторларының сөзінше, аймақтардағы филиалдарда қысқартулар жүріп жатқанда, орталық аппаратта жаңа департаменттер ашылып, «өз адамдарын» жоғары жалақымен орналастыру жалғасуда. Сонымен қатар, «қызметтік көліктерге жалған жөндеу жүргізіледі, ал аймақтардағы кеңселерде он жылдан бері жөндеу жүргізілмеген».
Қызметкерлердің айтуынша, жобалар миллиардтаған теңгеге жалғыз «Бастау» ЖШС арқылы өткізіліп келеді. Бұл компания барлық тендерлерде – сатып алудан бастап құрылысқа дейін – қатысып отырған көрінеді. Жобаларды басқару дирекциясын бұрын «Транстелекомда» жұмыс істеген Доненбай Газиз Болатұлы басқарады, ол қазіргі басшылықтың сенімді серігі ретінде аталады.
Сонымен қатар, «Қазақтелекомның» активтері мен штаттарын «АуылТелеком» ЖШС-не өткізу мәселесі де күмән туғызған. Бұл қадам компанияның болашақта жекеменшікке сатылуына алып келуі мүмкін деген болжам жасалады.
Қызметкерлердің ұжымдық хатында:
«Қазақтелекомдағы жағдай тек басқару дағдарысы емес, бүкіл қоғам үшін алаңдатарлық белгі. Біз компанияның болашағына, қарапайым қызметкерлердің тағдырына алаңдаймыз. Бізге әділдік, ашықтық және жауапкершілік қажет», – делінген.
