25 желтоқсанда Ақтау маңында Azerbaijan Airlines әуе компаниясының Бакуден Грозныйға бағыт алған ұшағы апатқа ұшырап, 38 адам қаза тапты. Апаттан 29 адам жарақат алды, оның ішінде екі бала бар. Қазіргі уақытта зардап шеккендердің жағдайы туралы Маңғыстау облыстық денсаулық сақтау басқармасы және басқа да ұйымдар ақпарат берді. Todayinfo ақпарат агенттігі хабарлайды.
Зардап шеккендер туралы мәлімет
Сағат 10:30-дағы мәлімет бойынша:
- Ауруханада 20 науқас ем қабылдап жатыр;
- 6 адам реанимацияда, олардың ішінде:
- 5 ересек пациент Маңғыстау облыстық ауруханасының жансақтау бөлімінде;
- 1 бала Маңғыстау облыстық балалар ауруханасының реанимациясында.
- МОБ-ның травматология бөліміне реанимациядан екі пациент ауыстырылған.
Қазақстандық және халықаралық мамандардың көмегі
- Ұлттық шұғыл медицина үйлестіру орталығы мен республикалық орталықтардың жоғары білікті мамандары Астанадан арнайы келген.
- Әзербайжанның Денсаулық сақтау министрлігі мен Төтенше жағдайлар министрлігінің өкілдері және санавиация бригадасы көмек көрсетуде.
- Зардап шеккендер мен олардың туыстарымен психологтар жұмыс істеп жатыр.
Ресей азаматтарын эвакуациялау
Бүгін таңертең, сағат 08:30-да, Ресей Федерациясының Төтенше жағдайлар министрлігінің санитарлық авиациясы арқылы ресейлік азаматтар эвакуацияланды.
Апат туралы қысқаша
Ұшақ бортында:
- 67 адам, оның ішінде 5 экипаж мүшесі болған;
- Жолаушылар:
- 6 Қазақстан азаматы,
- 42 Әзербайжан азаматы,
- 16 Ресей азаматы,
- 3 Қырғызстан азаматы.
Апаттан аман қалғандардың арасында қазақстандықтар жоқ.
Тергеу және комиссия жұмысы
Оқиғаға байланысты қылмыстық іс қозғалды. Қайғылы оқиғаның себептерін анықтау үшін Қазақстан, Әзербайжан және Бразилия өкілдерінен тұратын арнайы үкіметтік комиссия құрылды. Embraer компаниясы Қазақстанға өкілдерін жіберіп, тергеуге атсалысуда.
