Абай облысының әкімі Берік Уәли жұмыс сапарымен Мақаншы ауданына барып, Алакөл жағалауында жүргізіліп жатқан абаттандыру және инфрақұрылымдық жобалардың жүзеге асырылу барысын бақылап қайтты, деп хабарлайды Todayinfo ақпараттық агенттігі.
Берік Уәлидің айтуынша, екі ай бұрын да Алакөл жағалауына арнайы барып, жергілікті жердегі ең өзекті мәселелермен танысып, тұрғындар мен демалушылардың ұсыныс-тілектерін тыңдаған болатын. Сапар нәтижесінде анықталған негізгі проблемалар – жағалаудағы тозған инфрақұрылым, тазалық пен қауіпсіздіктің жеткіліксіз деңгейі, сондай-ақ туристік қызмет көрсету сапасының төмендігі болған.
Осы жағдайларды ескере отырып, облыстық бюджеттен Алакөл жағалауын жаңғырту мен дамытуға 658 миллион теңге көлемінде қаражат бөлінген. Қазіргі уақытта бұл қаражат есебінен ауқымды абаттандыру жұмыстары басталып, қарқынды жүргізілуде. Атап айтқанда, жағажай маңындағы арбат аймағы жаңартылып, сырланып, бояу жұмыстары жүргізіліп жатыр. Сонымен қатар, көп жылдан бері жөндеу көрмеген ескірген темір қоршаулар мен жақтаулар толықтай ауыстырылады.
Жобаның келесі кезеңінде көл жағалауындағы 5 шақырым жолға асфальт төселеді. Бұдан бөлек, демалушылардың ыңғайлылығы үшін 10 модульді құрылым, 15 биодәретхана, 40-тан астам киім ауыстыратын кабина орнату көзделіп отыр. Сондай-ақ, жағалаудағы тазалық пен тәртіпті сақтау мақсатында қоқыс жәшіктерінің және бейнебақылау камераларының саны едәуір арттырылмақ.
Туристердің қауіпсіздігі мен жағажай аумағының тұрақтылығын сақтау үшін пирс пен қалқыма (понтон) орнату да жоспарға енгізілген.
Абай облысының әкімі атап өткендей, жағалауға келуші туристер легінің көптігіне байланысты Арбат аймағындағы жүктемені азайту – маңызды міндеттердің бірі. Осыған орай жағалауға жақын маңда жаңа қоғамдық кеңістік салу жұмыстары басталған. Бұл аймақта 100 адамға арналған сауда-саттық нүктелері, үлкен сахна, заманауи субұрқақ, сонымен қатар тұрғындар мен қонақтар үшін арнайы серуендеу аймағы бой көтеретін болады.
Сапар барысында Берік Уәли Қарабұлақ ауылында жаңадан бой көтерген дәрігерлік амбулатория жұмысымен, Қабанбай ауылындағы тарихи-мәдени музейдің жай-күйімен танысты. Бұған қоса, аудан орталығында жеке инвестиция есебінен салынып жатқан май өңдеу зауытының құрылысы мен Жеңіс саябағында жүргізіліп жатқан жаңғырту жұмыстары да назардан тыс қалмады.
Айта кетейік, Мақаншы ауданы – Қазақстан Республикасы Президентінің Жарлығымен қайта құрылған, облыс орталығынан шалғай орналасқан, бірақ туристік әлеуеті жоғары шекаралық өңір. Облыс әкімі ауданның өзекті мәселелерін жақсы білетінін және оларды кезең-кезеңімен шешу бағытындағы жұмыстардың жалғасатынын жеткізді.
Берік Уәли өңірлік дамуға бағытталған жобалар алдағы уақытта да жүйелі түрде іске асатынын, Мақаншы сынды шалғай аудандардың инфрақұрылымын жақсарту – өңірлік саясаттың басым бағыттарының бірі екенін атап өтті.
