Қарағанды-Балқаш тасжолында, Ақшатау кентінің маңында шағын автобус апатқа түсіп, 7 адам тірілей жанып кетті, деп хабарлайды Todayinfo.
Қарағанды облыстық Полиция департаментінің баспасөз қызметі таратқан мәліметке сәйкес, апат 5 шілде күні таңертең болған.
«Алдын ала мәлімет бойынша, Kia Sedona көлігінің жүргізушісі Балқаш қаласы бағытында келе жатып, алда келе жатқан көліктерді басып озбақ болған. Жол белгілеріне назар аудармай, жөндеу жұмысы жүргізіліп жатқан жол учаскесіне шығып кетіп, қоршауға соғылған. Соқтығыс салдарынан көлік өртеніп кетті», – делінген хабарламада.
Көлік ішінде тоғыз адам болған. Оқиға салдарынан жеті жолаушы тірідей жанып кеткен. Жүргізуші мен бір жолаушы ауруханаға жеткізілді. Қылмыстық іс қозғалып, тиісті сараптамалар тағайындалды. Қазір тергеу амалдары жүргізіліп жатыр.
Осыған байланысты Қарағанды облыстық Полиция департаменті жүргізушілерге ескерту жасады.
«Көлік жүргізушілерінен жол жүру ережелерін қатаң сақтауды сұраймыз. Әсіресе ұзақ сапар кезінде демалыс жасап отыруды ұмытпаңыздар. Ол үшін арнайы жабдықталған кемпингтер мен тұрақтарды пайдаланыңыздар. Өз өміріңізді және айналаңыздағы адамдардың өмірін сақтаңыздар!» — делінген.
