«Дағдарыс орталықтары одағы» заңды тұлғалар бірлестігінің басқарма төрағасы Зульфия Байсакова әйелдерге қатысты зорлық-зомбылыққа қарсы күресте кешенді тәсілдің маңыздылығына тоқталды.
«Әйелдерге қатысты зорлық-зомбылықпен күресу — бұл құқық қорғау органдарының міндеті ғана емес, сонымен бірге қоғамның жалпы жауапкершілігі. Тұрмыстық зорлық-зомбылыққа төзбеу мәдениетін қалыптастыру, отбасының рөлін күшейту және қиын өмірлік жағдайларға тап болған әйелдерді қолдау қажет. Дағдарыс орталықтарымен, үкіметтік емес ұйымдармен және мемлекеттік органдармен бірлесіп біз зардап шеккендердің алдын алуға және оларға көмек көрсетуге бағытталған белсенді жұмысты жалғастырамыз», — деді ол.
Полицияның мәліметінше, 2024 жылдың 10 айында Алматыда әйелдерге қатысты 7705 қылмыс тіркелген.
Алмалы ауданы Полиция басқармасының әйелдерді зорлық-зомбылықтан қорғау бөлімшесінің аға инспекторы, полиция майоры Айгерим Куласбекованың сөзінше, қатыгез еркектермен күрес жүріп жатыр.
«Биыл біз отбасылық-тұрмыстық зорлық-зомбылықтың алдын алу бойынша жұмысты күшейттік. Профилактикалық есепке 6800-ден астам адам қойылды, 6200-ден астам қорғаныс ұйғарымдары шығарылды. Айта кету керек, бұл шаралар тек құқық бұзушылықтардың жолын кесуді ғана емес, сонымен бірге зардап шеккендерге көмек көрсетуді, сондай-ақ агрессорлармен жұмыс істеуді де қамтиды. «Серіктестік-тұрмыстық зорлық-зомбылықтың алдын алу құралы» пилоттық жобасы аясында 105 абьюзер психокоррекциялық бағдарламаларға жіберілді», — деді А. Куласбекова.
Ақпараттық-түсіндіру жұмыстарына ерекше көңіл бөлінеді. 2024 жылы қаланың оқу орындары мен ұйымдарында 160 дәріс, тренингтер мен кездесулер өткізілді, оларға 1000-нан астам тұрғын қатысты. Қалалық билбордтарда отбасылық зорлық-зомбылықпен күресуге, сондай-ақ отбасылық құндылықтарды сақтауға шақыратын әлеуметтік роликтер мен ұрандар бар.
Сонымен қатар, әйелдерді зорлық-зомбылықтан қорғау жөніндегі инспекторлар 776 әйелге консультациялық көмек көрсетті. Дағдарыс орталықтарына 150 әйел жіберілді, олардың 45-і балаларымен бірге «Жан-Сая» дағдарыс орталығын паналады, 9 әйел «Аналар үйі» баспанасынан қолдау тапты.
«Профилактиканың барлық субъектілерінің — полициядан азаматтық қоғамға дейінгі үйлесімді жұмысы ғана қылмыстар санын азайтуға және әйелдер үшін қауіпсіз жағдай жасауға мүмкіндік береді. Біздің болашағымыз — құрмет пен түсіністікке негізделген сау отбасылар», — деді Зульфия Байсакова.
Алматыда тұрмыстық зорлық-зомбылықтың алдын алу жөніндегі жұмыс азаматтық қоғамды белсенді тартуға және ODARA тәуекелін бағалау әдістемесін қоса алғанда, халықаралық тәжірибені енгізуге баса назар аудара отырып жалғаспақ.
Фото: dzen.ru
