Алматы қаласының Төтенше жағдайлар департаментінің мәліметінше, 22 мамыр күні сағат 15:35 шамасында 9-сынып оқушысы Проходное шатқалында орналасқан тау өзеніне түсіп кеткен. Оқиға 18 оқушы мен сынып жетекшісінің қатысуымен өткен фотосессия кезінде болған, деп хабарлайды Todayinfo.
«Қыз бала сүрініп кетіп, өзенге құлап кеткен», – деп хабарлады Алматы қаласының құтқару қызметі.
Шақырту алғаннан кейін Алматы қалалық құтқару қызметі жедел әрекет етіп, қыз баланы сағат 15:56-да судан шығарып алды. Құтқарушылар оқушыны плотинадан 500 метр қашықтықта тапқан.
«Қыз бала есін біліп жатты. Оқиға орнында алғашқы медициналық көмек көрсетілді, кейін жедел жәрдем бригадасына тапсырылды», – делінген ресми хабарламада.
Мамандар ата-аналар мен мұғалімдерге табиғат аясында балалармен серуендеу кезінде қауіпсіздік шараларын сақтауды ескертеді. Су айдындары маңында қауіпсіздік техникасы, оқушылардың қозғалысын бақылау және алдын ала қауіпсіздік нұсқамасы маңызды.
