Жыл соңына дейін Қарағанды қаласының барлық аудандары, оның ішінде жеке сектор да, орталықтандырылған сумен қамтамасыз етіледі, деп хабарлайды Todayinfo Қарағанды облысы әкімдігінің баспасөз қызметіне сілтеме жасап.
Қазіргі уақытта қала бойынша 21 жоба жүзеге асырылып жатыр. Солардың бірі — Жаңа Тихоновка ықшам ауданы, мұнда су құбыры желілерінің құрылысы қарқынды жүргізілуде.
Бұған дейін бұл аудандағы тұрғындар құдық суын пайдаланған. Жобаның нәтижесінде әр үйге су тарту көзделіп отыр. Атап айтқанда, диаметрі 63-160 мм болатын 22 шақырым магистральдық құбыр және диаметрі 25 мм болатын 32 шақырым таратушы желі төселеді.
«Жыл соңына дейін Жаңа Тихоновкадағы 1012 үй орталық сумен қамтылады. Жалпы, қала бойынша 67 шақырым жаңа су құбыры салынып, 2341 үй орталық жүйеге қосылады. Бұл Мемлекет басшысының тапсырмасына сәйкес, Қарағанды халқының таза ауыз суға деген қажеттілігін толық өтеуге мүмкіндік береді, — деді Қарағанды қалалық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Ержан Көкішев.
Құрылыс барысында өндіруші зауыт 50 жылға кепілдік беретін заманауи пластикалық құбырлар қолданылуда. Мердігер ұйым өкілінің айтуынша, осы технологиямен салынған нысандарда соңғы 15 жылда бірде-бір ақау немесе апат тіркелмеген.
Құбыр төсеуде көлденең бағытталған бұрғылау (КББ) әдісі пайдаланылады. Бұл — ор қазусыз, жабық тәсілмен төсеу технологиясы. Ол жол жамылғысы мен тротуарлар, электр желісі тіректері мен өзге инфрақұрылымды зақымдамай, құрылыс жүргізуге мүмкіндік береді.
«Бұл әдістің басты артықшылығы — жұмыстың ізі қалмайды. Құбыр шығатын жерлерде арнайы коммуникациялық құдықтар орнатылады. Бұрғылау кезінде бентонит қолданылады, ол қатқаннан кейін құбырды берік қорғайтын қаптамаға айналады, — дейді учаске бастығы Нұрлан Сағнаев.
Құрылыс аяқталғаннан кейін нысан «Қарағанды Су» ЖШС балансына беріледі. Ал бұзылған абаттандыру жұмыстары қалпына келтіріліп, келесі кезеңде жеке сектордағы жолдар асфальтталады.
