Түркістан қаласында 1 маусым – Балаларды қорғау күніне орай ҚР Оқу-ағарту министрлігінің бастамасымен «Бала үні – болашақтың үні» атты республикалық бастама аясында «Балалар үні» өнер фестивалі өтті, деп хабарлайды Todayinfo ақпараттық агенттігі.
Мерекелік іс-шараға Түркістан облысы әкімінің орынбасары Бейсенбай Тәжібаев арнайы қатысып, бүлдіршіндерді айтулы мерекемен құттықтады.
«Бұл ерекше күн – болашағымыздың жарқын бейнесі саналатын сүйкімді балаларға деген шексіз сүйіспеншілік пен қамқорлықтың мерекесі. Әрбір баланың амандығы, бақытты балалық шағы – кез келген елдің, әр отбасының басты құндылығы. Біздің елімізде, облысымызда өсіп келе жатқан жас ұрпақтың білімді, тәрбиелі, дені сау болып өсуіне барлық жағдай жасалып келеді. Мектептер мен балабақшалар бой көтеріп, түрлі мәдени-спорттық нысандар ашылуда. Бұл – Сіздердің болашағыңыз үшін жасалып жатқан маңызды қадамдар», – деді облыс әкімінің орынбасары.
Фестиваль барысында Түркістан облысының білім беру ұйымдарынан 20 мыңға жуық оқушының қатысуымен іріктеу кезеңдері өткізілді. Қорытынды гала-концертте үздік деп танылған 600-ден астам өнерпаз жас талант өз өнерін көпшілікке ұсынды. Балалар ән айтып, би билеп, ұлттық аспаптарда ойнап, сахналық қойылымдар арқылы ұлттық өнерді, ана тілімізді және туған өлкеге деген сүйіспеншіліктерін паш етті.
Фестиваль аясында «Бала дауысы – қоғам үнi» атты челлендж ұйымдастырылып, оқушыларға қоғамдағы өз орнын сезіндіру, мектеп, қала және ел өміріне араласуына жол ашу мақсатында арнайы дайындалған сұрақтарға жауап беру арқылы олардың пікірлері мен ұсыныстары тыңдалды. Бұл бастама балалардың ойын ашық жеткізуіне және өзіндік көзқарасын білдіруіне мүмкіндік берді.
Сондай-ақ, іс-шара барысында білім беру ұйымдарының ұйымдастыруымен кең көлемді қолөнер көрмесі өтті. Онда оқушылар мен ұстаздардың бірлескен шығармашылық жұмыстары, ұлттық нақыштағы бұйымдар, заманауи тұрмыстық қолданбалы заттар мен экологиялық материалдардан жасалған көркем туындылар көпшілік назарына ұсынылды.
Мерекелік шараға облыстық және қалалық білім басқармалары, мәдениет және спорт мекемелері, ата-аналар мен қала тұрғындары белсене қатысты. Балалардың шаттыққа толы өнері мен әсерлі қойылымдары көрермендер тарапынан зор қошеметке ие болды.
Түркістан облысы әкімінің баспасөз қызметі хабарлағандай, мұндай іс-шаралар балалардың бойындағы шығармашылық қабілетті дамытып қана қоймай, оларды отансүйгіштікке, рухани-мәдени құндылықтарды бағалауға тәрбиелейді. Фестиваль алдағы уақытта дәстүрлі түрде жалғасын таппақ.
