Сауран секторында инфрақұрылымдық жобалар қарқынды жүзеге асырылуда. Бүгін Түркістан қаласының әкімі Әзімбек Пазылбекұлы кезекті көшпелі кездесу аясында Сауран секторының тұрғындарымен жүздесті, деп хабарлайды Todayinfo ақпараттық агенттігі.
Кездесу барысында қала басшысы 2024 жылы тұрғындар тарапынан көтерілген мәселелердің орындалу барысы мен қазіргі уақытта сектор аумағында атқарылып жатқан жұмыстар жөнінде баяндады. Сонымен қатар, алдағы кезеңге жоспарланған жобалармен таныстырып, тұрғындармен ашық пікір алмасып, сауалдарға жауап берді.
Кездесу кезінде тұрғындар тарапынан жол сапасы мен қауіпсіздігі, аулалар мен ойын алаңдарының тазалығы, қоғамдық көлік қатынасы, жарықтандыру және инфрақұрылым сапасына қатысты бірқатар мәселелер көтерілді. Әкім барлық сұрақтарға нақты жауап беріп, тиісті сала басшыларына тапсырмалар жүктеді.
Қазіргі таңда Сауран секторында бірқатар инфрақұрылымдық жобалар кезең-кезеңімен жүзеге асырылуда. Атап айтқанда, А.Жангелдин көшесінде жаңа ойын алаңшасы салынып жатыр. Б.Майлин көшесінің айналма жол бөлігінде шағын архитектуралық формалар (МАФ) орнатылуда. №1 және №2 мөлтек аудандарда аулалық аумақтарды абаттандыру, ойын алаңшаларын жөндеу және жарықтандыру шамдарын ретке келтіру жұмыстары жүргізілуде. Сонымен қатар, О.Жарылқапов көшесінде жол белгілері орнатылып, Әл-Фараби көшесінде жол жөндеу жұмыстары толық аяқталды. Энергетиктер көшесінде аулаішілік абаттандыру жұмыстары басталып кетті.
Сондай-ақ, сектор аумағындағы жаңадан бой көтерген тұрғын үйлерге су жүйелерін тарту және қайта құру бойынша 2-кезең жобасы әзірленіп жатыр. Бұл жобаның құрылыс жұмыстары 2026 жылы басталады деп жоспарланған.
Кездесу соңында қала әкімі тұрғындарды жеке қабылдап, арыз-шағымдарын тыңдады. Айта кетейік, Әзімбек Пазылбекұлының тұрғындармен көшпелі кездесулері жалғасуда. Бүгін, 28 мамыр күні сағат 15:00-де Сандыбаев көшесіндегі №18 мектепте кездесу өтсе, ертең, 29 мамыр күні сағат 10:00-де Мәдени рухани орталықта орналасқан «Ұлы дала орталығы» кешенінде, ал сағат 15:00-де ӘІО-дағы 9-шы көше бойындағы №33 мектепте халықпен жүздесулер жоспарланған.
