1 маусым – Халықаралық балаларды қорғау күні – бұл тек мерекелік шаралар емес, балалықты қорғау, балаларға қамқор болу, сенім мен қауіпсіз орта қалыптастыру деген ұғымның нақты көрініс табатын күні. Бұл – баланың тұлға ретінде қалыптасуына жағдай жасау, оның жалғыз емес екенін сезіндіру. Қарағанды облысы әкімінің орынбасары Әлібек Әлденей осылай дейді, деп хабарлайды Todayinfo.
Халықаралық мереке күні Қарағанды облысындағы «Таңшолпан» балаларды қолдау орталығында өткен кездесуде ата-анасыз қалған, тағдырдың салмағын ерте көрген балалармен жүздесу өтті.
Балалардың жүзінен мұң емес, керісінше, өмірге деген құлшыныс пен ерте есейген ішкі тегеурін байқалды. Олар – тағдырдың тәлкегіне қарамастан, өз болашағын өзі құруға дайын қайсар ұрпақ.
«Орталықтағы тәртіп пен үйлесімділік мекеме басшысы Серік Елтайұлының тәжірибесі мен ұйымдастырушылық қабілетінің нәтижесі екені көзге көрініп тұр.
Ұжымда психологтар, тәрбиешілер, әлеуметтік қызметкерлер арасында өзара түсіністік пен кәсіби бірлік қалыптасқан.Балалар шағын отбасылық қауымдастықтарға бөлініп, ағалы-інілі, әпкелі-сіңлілі болып өмір сүреді. Бұл – оларды бір үйдің жылуына бөлейтін ерекше жүйе», — дейді ол.
Мемлекет жетім және ата-ана қамқорлығынсыз қалған балаларды іспен қолдап келеді. Олардың болашағына бағытталған нақты бастамалар жүзеге асырылуда:
- Болашаққа инвестиция – «Ұлттық қор – балаларға» жобасы
7 миллионға жуық балаға жыл сайын шот ашылып, 18 жасқа толғанда тұрғын үй немесе білім алуға жұмсалады. - Білімге жұмсалатын капитал – «Келешек» бағдарламасы
1–5 жас аралығындағы балаларға 472 мың теңге бастапқы капитал аударылды. - Әлеуметтік қолдау
Колледжге түскен түлектер үшін жолақы мен тамақ тегін. Жыл сайын 200 мың теңгеден астам сома керек-жарағына бөлінеді. - Жұмыспен қамту
Облыстағы 38 колледж түлектері «Атамекен» мен жұмыспен қамту орталықтарының көмегімен жұмысқа орналасып жатыр.
«Қарағанды облысының әкімі Ермағанбет Бөлекпаевтың қолдауымен орталыққа 30 миллион теңге көлемінде сертификат табысталды. Бұл қаражатқа 71 бала 50 күнге табиғаты әсем Шығыс Қазақстандағы лагерьде демалатын болады. Балалар демалып келгенше, орталықта жөндеу жұмыстары жүргізіледі.Бүгін мейірімге бөленген бала – ертең айналасына мейірім тарататын азамат.Сондықтан баланы қорғау – аяу емес, қолдау көрсету, қауіпсіз әрі сенімді орта қалыптастыру.Мемлекетпен қатар, әр азамат та осы игі іске өз үлесін қосуы тиіс», — дейді ол.
