Жыл басынан бері облыс аумағында кәмелетке толмағандар тап болған 268 жол-көлік оқиғасы тіркеліп, алты жасөспірім көз жұмып, 310-нан астам бала әртүрлі дене жарақатын алған. Бұл көрсеткіш жолдағы бақылауды күшейтудің, ата-аналардың, педагогтардың және жүргізушілердің жауапкершілігін арттырудың маңызын айқындайды, деп хабарлайды Todayinfo агенттігі AtyrauPressке сілтеме жасап.
Аймақта «Қауіпсіз жол» жедел-профилактикалық іс-шарасы аясында «Абайлаңыз – балалар!» республикалық акциясы өтті. Шараның негізгі мақсаты – мектеп жасындағы балалардың қатысуымен болатын жол-көлік оқиғаларының алдын алу және олардың жолдан өткендегі қауіпсіздік дағдыларын қалыптастыру. Бұл туралы облыстық ПД Жергілікті полиция қызметі басқармасының жол қауіпсіздігін қадағалауды ұйымдастыру тобының инспекторы Айбек Алимов брифинг барысында мәлімдеді.
– Балалар мен жасөспірімдердің қауіпсіздігі – қоғам үшін аса маңызды. Акция аясында мектепке дейінгі және мектеп ұйымдарында тәрбиелік, ақпараттық және спорттық іс-шаралар ұйымдастырылуда. Жасөспірімдерге жол жүру ережелері түсіндіріліп, жолдағы дұрыс әрекеттерге дағдыландыру жұмыстары жүргізіліп жатыр. Велошерулер, сурет байқаулары, жолда жүру мәдениетін насихаттайтын кездесулер өткізіліп келеді, – деді А.Алимов.
Сонымен қатар 1 маусым – Балаларды қорғау күніне орай Атырау қаласындағы №42 мектепте «Жас қорғаушылар кубогы» атты кіші аяқ добынан спорттық турнир өткізілді. Жас жол инспекторлары мен мектеп оқушылары қатысқан шара құқықтық мәдениетті арттыру мен салауатты өмір салтын насихаттауға бағытталды.
– Әсіресе, соңғы қоңырау, мектеп бітіру кештері кезінде балалардың қатысуымен оқыс оқиғалар жиі тіркеліп отырады. Сондықтан ата-аналарды балаларының тәртібін қадағалауға, ал жүргізушілерді жолда сақ болуға шақырамыз. Жолдағы тәртіп – бәріміздің ортақ жауапкершілігіміз, – деді А.Алимов.
Атырау облыстық Полиция департаменті балалардың амандығы мен қауіпсіздігін қамтамасыз ету жолындағы кешенді алдын алу жұмыстарын жалғастыра бермек.
