Алматы қаласының Зерделі ықшамауданында өткен «Таза Қазақстан» акциясы аясындағы сенбілік – тек аумақты тазарту шарасы ғана емес, сонымен қатар рухани құндылықтарды ұлықтау мен патриоттық тәрбие берудің жарқын үлгісіне айналды. Іс-шарада тұрғындар танымал мәдениет және спорт қайраткерлерімен, қоғам белсенділерімен бірге аула тазалап, қоршаған ортаға жанашырлық танытты.
Қала әкімінің орынбасары Азамат Қалдыбеков акция қатысушыларына арнаған сөзінде табиғатқа құрметпен қарау – ұлттың рухани тазалығы мен мәдени дамуының көрінісі екенін атап өтті:
«Табиғатқа ұқыпты қарауды бала кезден үйрету қажет. Бұл – әр алматылықтың азаматтық парызы. Қала тазалығы – ортақ жауапкершілік», – деді ол.
Бұл ұстаным қазақ халқының дәстүрлі табиғатпен етене байланысын, тазалық пен тәртіпке деген ұлттық көзқарасын насихаттауға бағытталған.
Алматы қалалық Қоғамдық кеңесінің төрағасы Махамбет Хасенов өз сөзінде бірлік пен қоғамдық жауапкершілік туралы ой қозғап:
«Тазалық пен қоршаған ортаға құрмет – тек экология ғана емес, ел бірлігі мен жауапкершілік мәдениетінің көрсеткіші. Қаламыздың жарқын болашағы әрбір азаматтың белсенділігіне байланысты», – деді.
Шараға қатысқан танымал әртістер, ақындар мен спортшылар – жастарға үлгі болатын тұлғалар. Олар патриоттық сана мен экологиялық тәрбие арқылы ұрпаққа рухани бағыт сілтеп, ұлттық болмысты сақтаудың маңыздылығын көрсетті. Олардың қатарында Жан Байжанбаев, Тәуекел Мүслім, Санжар Мәди, Бақтияр Тайлақбаев, Алмас Ахметбекұлы, Спатай Темір және басқалары бар.
Актер Жан Байжанбаев өз пікірінде былай деді:
«Тазалық – әркімнің өзінен басталуы тиіс. Мұндай шаралар тек қала көркі үшін емес, адамдардың рухани өсуі мен мәдениет деңгейін арттыру үшін де қажет».
Бұл акция – балалар мен жасөспірімдердің бойында жауапкершілік, әділдік, бірлік пен ынтымақ сияқты құндылықтарды қалыптастыруға бағытталған тәрбиелік мәні зор бастама болды. Рухани құндылықтарды насихаттау арқылы жастар арасында өмірге құштарлықты арттырып, жағымсыз әлеуметтік мінез-құлықтардың алдын алуға да ықпал етеді.
Тұрғындардың айтуынша, мұндай игі істер жиі өткізіліп тұрса, қоғамның рухани іргесі беки түсері анық. «Таза Қазақстан» сынды бастамалар арқылы Алматы қаласы – бірлік пен мәдениетке негізделген өркениетті қоғам құру жолында алға жылжып келеді.
