Биыл Алакөл демалыс аймағы шомылу маусымына жаңартылған инфрақұрылыммен, сапалы көлік қатынасымен және күшейтілген қауіпсіздік шараларымен дайын. Жетісу облысы жағалаудағы сервисті жақсартуға бағытталған ауқымды жұмыстар атқарды,еп хабарлайды Todayinfo.
Назарларыңызға жаңа маусымның 10 басты артықшылығын ұсынамыз:
Астана мен Алматыдан тікелей ұшақтар
Үшарал қаласына әуе рейстерінің саны артты. Енді «Алматы – Үшарал» және «Астана – Үшарал» бағыттары бойынша күнделікті рейстер қатынайды. Мемлекет субсидиялаған билет бағасы – небәрі 20 000 теңге.
Қосымша теміржол бағыттары іске қосылды
Алакөлге 13 пойыз қатынайды. Олардың ішінде «Тальго» жүрдек пойыздары, сондай-ақ Өскемен, Павлодар, Қызылорда, Семей және Ақтоғай бағыттары қамтылған.
Автобус маршруттары қолжетімді
Алматыдағы «Сайран» және Талдықорған автобекеттерінен Ақши мен Көктұма ауылдарына тұрақты автобустар жүреді. Билет құны – 5 000 – 9 000 теңге аралығында.
Медицина қызметі тәулік бойы жұмыс істейді
Ақши ауылында жедел жәрдем, дәріхана және дәрігерлік амбулатория жұмыс істейді. Облыс орталығынан мамандандырылған дәрігерлер іссапармен жіберілген.
Қауіпсіздік шаралары күшейтілген
Жағалауда 19 құтқарушы мен 28 полиция қызметкері жұмыс істейді. 9 құтқару мұнарасы орнатылған. Су мен өрт қауіпсіздігі үшін ТЖД кезекшілігі ұйымдастырылған.
Су көліктеріне қатаң бақылау орнатылды
Жетісу облысында Суды ортақ пайдалану ережесі бекітіліп, 3 тұрақ пен 1 айыппұл тұрағы құрылды. Көлік инспекторлары саны артты.
Интернет пен байланыс жақсарды
Жағалауда 16 базалық станция жұмыс істейді. 2024 жылы оптикалық-талшықты желі тартылды, қазір туристік нысандар кезең-кезеңімен интернетке қосылып жатыр.
Санитарлық инфрақұрылым жаңартылды
11 санитарлық-гигиеналық торап орнатылып, маусым соңына дейін тағы 12-сі қосылады. 60 қоқыс жәшігі мен 20 биотуалет орнатылды.
Кәріз жүйесі салынып жатыр
2023 жылы басталған 69,7 км кәріз желісі құрылды. Қазір Ақши ауылында кәріз тазарту құрылғысының құрылысы жүріп жатыр. Жоба 2026 жылы аяқталады.
Электрмен жабдықтау күшейтілуде
«Ақши» қосалқы станциясы салынып, Бескөл – Ақши бағытында жоғары кернеулі желілер тартылуда. Көктұма мен Ақшиде жағалауды бекіту жұмыстары басталды.
Алакөл – қазақстандық туризмнің басты бағыттарының бірі. Жаңа инфрақұрылым, қауіпсіздік, қолайлы көлік қатынасы мен экологиялық жағдай туристер үшін жағалауда демалуды әлдеқайда жайлы етпек.
