Алакөл ауданының әкімі Алмас Абдинов бұқаралық ақпарат құралдары өкілдерімен өткізілген баспасөз туры барысында өңірдің соңғы үш жылдағы әлеуметтік-экономикалық даму қорытындыларын таныстырды, деп хабарлайды Todayinfo.
«Жер жәннаты Жетісудың Алакөл өңіріне қош келдіңіздер! Дәстүрге айналған бұл шарада сіздермен жүздесіп, ауданымыздағы атқарылған жұмыстар туралы қысқаша мәлімет бергім келеді», – деді әкім.
Соңғы үш жылда ауданның салық базасы 8,5 млрд теңгеден 14,3 млрд теңгеге дейін артқан. Тек 2025 жылдың алғашқы 5 айында бюджеттік түсім көлемі 7 млрд 766 млн теңгені құрады. Оның ішінде:
- 5,3 млрд теңге – жергілікті бюджетке;
- 2,4 млрд теңге – республикалық бюджетке түскен;
- Меншікті салық түсімі – 2,46 млрд теңге, жалпы кірістің 31,7%-ын құрады.
Аудан бойынша үш жыл ішінде 34 млрд 340 млн теңгенің өнеркәсіп өнімі өндіріліп, 23,7 млрд теңгеге 10 жоба жүзеге асырылды. Бұл жобалар нәтижесінде 91 жаңа жұмыс орны ашылған.
2025 жылы қосымша:
- 78 млн теңгеге 2 жоба іске асыру,
- 10 жұмыс орнын құру жоспарланған.
Экономиканың негізгі қозғаушы күші – инвестиция. Үш жылда ауданға тартылған жалпы инвестиция көлемі 305,9 млрд теңгені құрады. Оның ішінде:
- Бюджеттен тыс қаражат есебінен 50,6 млрд теңгеге 5 ірі жоба жүзеге асып, 432 жұмыс орны ашылды.
Анықтама ретінде:
- 2025 жылдың алғашқы 5 айында – 36,7 млрд теңге инвестиция тартылды.
- Оның 2,7 млрд теңгесі – бюджет қаражаты,
- 34 млрд теңгесі – жеке инвестициялар.
