Алматы облысының тұрғыны Арманжан Арықбай әскер қатарына алынбас бұрын көру қабілетінен айырылған анасының күтімімен айналысқан. Отбасының айтуынша, оны мәжбүрлеп Қонаев қаласына алып кеткен. Екі күн бойы қаладағы әскери комиссариат ғимаратында ұсталған Арманжан кейін Тараз қаласындағы №5513 әскери бөлімге жіберілген.
Арада бірнеше апта өткенде, ата-анасының келісімінсіз және нақты түсіндірмесіз ол психиатриялық ауруханаға ауыстырылған. Анасы осы уақыт аралығында ұлының тірі екенінен де бейхабар болған.
Бұл жағдай қоғам белсенділері мен құқық қорғаушылар арасында алаңдаушылық тудырып отыр. Жақындары Арманжанның құқығы бұзылғанын айтып, тиісті органдардан ресми түсініктеме мен әділ тергеу жүргізуді талап етуде.
