3,5 млрд теңгені жымқырды деген айып тағылған танымал қоғамдық белсенді әрі кәсіпкер болған Перизат Қайрат 34-ші туған күнін қамауда отырып қарсы алды, деп хабарлайды Todayinfo.
Ол былтыр қыркүйекте Англиядағы Кембридж университетіне магистратураға түскенін жариялаған соң көп өтпей ұсталған.
Прокуратура Перизат Қайраттың азаматтар мен ұйымдардан мүгедек балаларға, сондай-ақ су тасқыны мен Таяу Шығыстағы қақтығыстан зардап шеккендерге қайырымдылық көрсету желеуімен 3 миллиард теңгеден астам қаржыны жымқырғанын мәлім етті.
Перизат Қайрат пен оның анасы Ғайни Алашбаеваға қатысты қылмыстық іс Астана қаласының қылмыстық істер жөніндегі ауданаралық сотына жіберілді. Күдіктілерге қатысты сот отырысының күні әлі жарияланған жоқ.
Қазақстанда сирек кездесетін ірі алаяқтық оқиғасының іс материалы 109 томнан тұрады.
Еске салсақ, танымал блогер 2021 жылы қайырымдылық қорын құрып, біраз уақыт ішінде сенімді имидж қалыптастырған. Алайда, құқық қорғау органдарының мәліметтері бойынша, бұл қор қарапайым халықтың сенімін пайдаланып, қаржыны жымқырудың құралына айналған.
Ол 2024 жылдың қарашасында ұсталды. Тергеу оның тек жеке өзі емес, туыстары мен жақын достарын да қаражатты қолма-қол ақшаға айналдыру схемасына тартқанын болжайды. Бұл адамдарға «қызметтері» үшін қаржылай сыйақы төленіп отырған.
Перизат Қайратқа қатысты іс қоғамдағы сенім мен әділет мәселесін қайта көтерді. Қоғам енді бұл іске байланысты әділ сот үкімін күтуде.
Тергеу барысында келтірілген шығын сомасы бірнеше рет өзгергенімен, соңғы мәлімет бойынша ол 3,5 млрд теңгеге жеткен. Тергеу мәліметтеріне сәйкес, бұл қаражат заңсыз жолмен алынған. Мысалы, Перизат Қайрат бұл ақшаны гүл дүкенін сатып алуға жұмсаған. Ол қоғамға өзін табысты кәсіпкер ретінде көрсетіп, бизнесті заңды табыс көзі ретінде насихаттаған.
Сот Перизат Қайраттың бағалы мүлкінің тағдырын шешетін болады. Ол жәбірленушілердің шығынын өтеу үшін жұмсалуы немесе тәркіленіп, мемлекет меншігіне берілуі мүмкін.
Қазіргі таңда жәбірленушілердің нақты саны әлі анықталмаған. Олардың қатарында Перизат Қайраттың қайырымдылық қорына қомақты қаражат аударғандар да бар. Кейбір жәбірленушілердің мүддесін прокуратура қорғайды.
Биыл желтоқсанда Перизат Қайрат басқарған қайырымдылық қоры «Biz birgemiz Qazaqstan 2030» қоғамдық бірлестігі таратылды.
Тергеу барысында Перизат Қайрат кінәсін мойындаудан бас тартты. Қазіргі уақытта ол уақытша тергеу изоляторында отыр.
Еске салайық, қамаудағы қылықты қыз ертеректе тұрмысқа шығып, ажырасып кеткен. Арабтың шейхтерімен де жиі араласатын бикештің баласы жоқ, Қайырымдылық істерімен танылған Перизат Қайрат бүгінде анасымен бірге қылмыстық іске тартылып жатыр.
