ҚР Сыртқы істер министрлігінің ресми өкілі Айбек Смадияров Оңтүстік-Шығыс Азия елдерінде жүрген қазақстандықтарға қатысты қоғамда тараған «құлдыққа түсті» деген ақпараттарға нақты жауап берді,деп хабарлайды Todayinfo ақпарат порталы.
«Оңтүстік-Шығыс Азия елдеріне қазақстандықтар құлдыққа түсіп жатыр деген ақпараттар тарап жүр ғой. Оның бәрін тексердік. Бұл ешқандай да құлдық емес. Бұл тек қана алаяқтық», – деді ол.
Смадияровтың сөзінше, қазақстандықтар көбіне жоғары жалақы уәдесіне сеніп, интернет пен колл-орталық саласындағы «жұмыс» іздеп шетелге барады. Кейін алаяқтық ұйымдардың торына түсіп, өздері не істерін білмей, Қазақстан елшілігіне жүгінеді.
«Айлықтары жоғары, бір жылдай жұмыс істеп, ақшаларын жинап алады да, сосын не істерін білмей: “Маған көмектесіңіздер, мені шығарыңыздар”, – дейді. Біз барып көмектесеміз. Елге келеді, сосын қайтадан ақша жасау үшін барады», – деді ол.
Сыртқы істер министрлігі Қытай, БҰҰ және жергілікті билік органдарымен бірлесіп, мұндай халықаралық алаяқтық синдикаттарға қарсы күрес жүргізіп жатқанын атап өтті.
«Жақында Камбоджа мен Лаоста бірнеше Қытай азаматы ұсталып, елдеріне қайтарылды. Себебі көбіне солар осындай компанияларды басқарады», – деп түсіндірді Смадияров.
Министрлік өкілі алаяқтық құрбанына айналған қазақстандықтардың көпшілігі жоғары білімді, бірнеше тіл білетін, саналы адамдар екенін де айтты.
«Олар білмейді, аңқау деп айтуға болмайды. Білмесе, екі тіл меңгерген, жоғары білімі бар. Сондықтан ешқандай да құлдық жоқ», – деп түйіндеді Смадияров.
