Петропавл қаласында «Ботай» мемориалдық кешенінің салтанатты ашылуы өтті. Шара барысында сөз сөйлеген қала әкімі Серік Мұхамедиев бұл бастаманың бүкіл өңір үшін ерекше маңызға ие екенін атап өтті, деп хабарлайды Todayinfo ақпараттық агенттігі.
Әкімнің айтуынша, мемориалдың қала кіреберісіне орнатылуының тарихи мәні бар. Себебі осыдан бес мың жыл бұрын дәл осы Солтүстік Қазақстан аумағында ата-бабаларымыз адамзат тарихында алғашқылардың бірі болып жылқыны қолға үйреткен.
«Ботай» мемориалы ұрпақтар сабақтастығының белгісі және тарихи өткенімізге деген терең құрметтің көрінісі ретінде бағаланды. Мұхамедиевтің сөзінше, бұл нысан жас ұрпақтың туған жеріне деген мақтаныш сезімін оятып, ұлттық болмысқа деген құрметін арттыруға ықпал етпек.
«Аталған кешен Петропавл қаласының сәулеттік келбетін толықтыратын маңызды нысандардың біріне айналды. Ол болашақта қала тұрғындары мен қонақтары үшін мәдени-тарихи орталық болады деп сенемін», – деді қала әкімі.
