Кейінгі апталарда көптеген әлеуметтік желі қолданушысы шетелдік жасөспірімнің би қимылдарын қайталап, контент түсіріп жатыр. Индонезиядағы Риау провинциясында тұратын 11 жастағы Райян Аркан Диканың қайықтың тұмсығында тұрып билеген видеосы TikTok пен Instagram желілерінде жылдам тарады, деп хабарлайды Todayinfo америкалық басылымға сілтеме жасап.
Диканың биі түрлі әндерге монтаждалып, әлем жұлдыздарының назарын аударды. Бүгінде Дика тек әлеуметтік желінің жұлдызы емес, туған өңірі – Риау провинциясының туризм елшісі атанды.
Бейнежазбада қара киім киіп, күннен қорғайтын көзілдірік таққан Дика жіңішке қайықтың тұмсығында өзіне тән байсалды қимылдарды қайталап, билейді.
– Бұл биді өзім ойлап таптым. Барлығы аяқ астынан шықты, – деді Дика BBC Indonesia тілшісіне берген сұхбатында.
Диканың алғашқы видеосын TikTok желісіне қаңтар айында «Ленса Рамс» есімді қолданушы жүктеген.
Бала Индонезиядағы тарихы фестивальдің бірінде Pacu Jalur атты дәстүрлі қайық жарысына қатысқан.
Онда Ұзын каноэ тәрізді қайықтың әрқайсысында «туканг тари» деген биші бала болады. Ол жарыс кезінде биімен ескекшілерге рух беріп тұрады.
Дика бұл жарысқа 9 жасынан қатысып келеді. Ол осы дәстүрдің танытушының бірі. Әр қайықтың өз бишісі бар және олардың әрқайсысы жарысқа өз атмосферасын қосады.
Бейнежазба бірнеше ай бұрын түсірілсе де, шілде айының басында оның танымалдығы күрт артты. Себебі, Диканың биі икемге оңай, көңілді.
Желіде Диканың биін қайталағандар қатарында көптеген TikTok және Instagram қолданушыларынан бөлек, танымал тұлғалар да бар. Мәселен, NFL жұлдызы әрі Тейлор Свифттің сүйіктісі Трэвис Келсидің қайталауындағы видео 13 миллионнан астам қаралым жинады.
АҚШ-тағы Savannah Bananas бейсбол командасының “Party Animals” атты бөлімшесі би нұсқасын алаңда орындап, TikTok-та 5 миллионнан астам қаралым жинады. Сондай-ақ, АҚШ құрамасының футболшысы Диего Луна Гватемалаға қарсы гол соққан соң, дәл осы биді орындап, жеңісті ерекше атап өтті.
Диканың видеосы арқылы жергілікті дәстүрдің қайта жаңғыруына себеп болғанын атап өткен Риау билігі, оны туризм елшісі етіп тағайындады. Сонымен қатар, облыс губернаторы Абдул Вахид оған 20 миллион рупий (шамамен 1200 АҚШ доллары) көлемінде білім беру стипендиясын табыстады. Арнайы рәсім кезінде Дика губернатормен бірге би де биледі.
– Уау! Мен сондай бақыттымын. Губернатормен кездесемін деп ешқашан ойламаппын, – деді Дика стипендия туралы жария еткен ресми хабарламада.
