Қазақстандық әнші Алмагүл Батталиева Беларусьтің Витебск қаласында өткен атақты «Славян базары» халықаралық ән байқауында Гран-при жүлдесін жеңіп алып, еліміздің өнер сахнасындағы зор жетістігін паш етті. Бұл қуанышты жаңалықты байқаудың ресми ұйымдастырушылары мен өнер сүйер қауым ерекше ықыласпен қабылдады,деп хабарлайды Todayinfo.
Әнші байқаудан кейінгі эмоциясымен бөлісіп, бұл жеңістің оңай жолмен келмегенін атап өтті:
«Мен әлі де жеңіске жеткеніме сене алмаймын. Бұл – мен үшін зор мәртебе. Бұл мүсіншені Қазақстанға алып кету бақыты бұйырғанына шексіз қуаныштымын. Мен бұл жолда сегіз жыл бойы еңбек еттім: бірнеше рет ұлттық іріктеуден өттім, бізде бәсекелестік өте жоғары. Қазақ халқының табиғаты әншілікке жақын – әрбір келген өнерпаз бұл сахнадан құр қол қайтқан емес. Бұл өте мәртебелі байқау», – деді Алмагүл Батталиева.
Беларусь жұртшылығы – ерекше қолдаушы
Алмагүлдің айтуынша, «Славян базары» байқауы оны тек кәсіби тұрғыдан ғана емес, эмоциялық жағынан да терең әсерге бөлеген. Ол Беларусь елінің мейірімді халқы мен тамаша атмосферасын ерекше атап өтті:
«Беларуське келгенімде мұндағы халықтың жайдары жүзінен күннің шуағы төгіліп тұрғандай әсер алдым. Залдар лық толы, көрермендер орындарынан тұрып қол соғып қошемет көрсетті. Бұл – өнерге деген құрметтің айқын белгісі. Байқаудың ұйымдастырылу деңгейі өте жоғары», – деді әнші.
«Славян базары» – халықаралық беделді өнер алаңы
Беларусьтің Витебск қаласында дәстүрлі түрде өтетін «Славян базары» халықаралық байқауы – Шығыс Еуропа мен ТМД елдеріндегі ең беделді өнер сайыстарының бірі. Байқауға қатысу – әрбір жас өнерпаз үшін үлкен мектеп қана емес, сонымен қатар халықаралық сахнада танылудың бірегей мүмкіндігі.
Қазақстандық өнерпаздардың бұл байқауда жеткен жетістіктері – елдегі музыкалық білім мен орындаушылық деңгейінің жоғары екенінің дәлелі. Бұған дейін де көптеген қазақстандық әншілер бұл сахнада жүлделі орындарға ие болған.
Қазақстанның атын әлемге танытқан жарқын жеңіс
Алмагүл Батталиеваның жеңісі – тек жеке жетістік емес, бұл Қазақстан өнерінің табысы. Оның өнерге деген адалдығы, кәсіби шеберлігі мен табандылығы жас таланттарға үлкен мотивация береді.
Славян елдерінің мәдениетаралық диалогын дамытуға зор үлес қосатын бұл байқаудағы жеңіс – еліміздің халықаралық өнер кеңістігіндегі беделін одан әрі арттыра түсті.
Алмагүл Батталиеваның Дәнеш Рақышев атындағы Жетісу облыстық филармониясында жеке дауыстағы әнші болып жұмыс істеп жүргеніне үш жыл болды. Ол бұған дейін де бірнеше республикалық, халықаралық байқаулардың лауреаты атанған. Биылғы «Славян базары» байқауындағы екі күнде ол 137 ұпай жинап, қазылар алқасы мен көрермендердің ыстық ықыласына бөленді, сөйтіп фестивальдың Гран-приін иеленді.
Атап өтсек, 2015 жылы Алматы қаласындағы П.Чайковский атындағы музыка колледжінде, Т.Жүргенов атындағы Қазақ ұлттық өнер академиясында білім алған. Сонымен қатар Алмагүл бірнеше аспапты – аккордеон, фортепиано және укулелены еркін меңгерген.
