Tанымал заңгер, құқықтық белсенді әрі алаяқтармен күресіп жүрген Нұрсұлтан Орынбек Sadaq Media-ның «Durbi» подкастының қонағы болып, Қазақстандағы инфобизнес саласына және оның көлеңкелі тұстарына қатысты өткір пікір білдірді. Сұхбат барысында ол белгілі кәсіпкер Қуаныш Шоңбайды «инфосығандықтың атасы» деп атады,деп хабарлайды Todayinfo.
«Елімізге ‘инфобизнес’ деген ұғымды алып келген — Қуаныш Шоңбай. Ол бұны мақтанып айтып жүр. Иә, олар бастапқыда бұл саланы жақсы ниетпен енгізген болар. Бірақ, сол жолмен пайда тауып, байып, оны халықпен бөліскендер өте аз. Көпшілігі алаяққа айналды. Себебі олар адамның санасын қалай улауға болатынын, сеніміне қалай кіру керектігін үйретті», — деді Нұрсұлтан Орынбек.
Заңгердің айтуынша, бүгінгі күні инфобизнес саласында алаяқтыққа жол ашқан техникалар мен психологиялық тәсілдер дәл сол алғашқы топтан тараған.
Нұрсұлтан Орынбек сұхбат барысында инфобизнестегі бүкіл алаяқтықтың жауапкершілігі саланы бастаған топтың мойнында екенін нақты айтты:
«Олар осы саланы біздің нарыққа әкелді. Оны қалай бақылағанын білмеймін, бірақ меніңше, олар үшін бәрібір болды. Кейінгі инфобизнес алаяқтары дәл сол техникаларды пайдаланып, халықты алдады. Сол себепті мен Қуаныш Шоңбайды ‘инфоалаяқтықтың атасы’ деп айттым. Себебі негізді құралдарды солар берді», — деді ол.
Заңгердің сөзіне қарағанда, қазіргі таңда инфобизнестің атын жамылып, халықты алдап жүрген курстар мен тренингтер, мотивациялық бағдарламалар, қаржы пирамидасына ұқсас жобалар — барлығы да дәл осы жүйенің жалғасы.
