Қостанай – Әулиекөл бағытындағы автожолда ауыр жол-көлік оқиғасы тіркелді. Новонежинка мен Айсары ауылдарының арасындағы жол учаскесінде ВАЗ-2110 маркалы жеңіл көлік пен Shacman жүк көлігі соқтығысып, соның салдарынан екі көлік те отқа оранған. Бұл туралы жергілікті құқық қорғау органдары хабарлады, деп хабарлайды Todayinfo.
Қайғылы оқиға салдарынан жеңіл көліктің жүргізушісі, бір ересек жолаушы және 2023 жылы туған сәби оқиға орнында жан тапсырды. Өрт салдарынан көліктер толықтай жанып кеткен.
Алдын ала тергеу деректеріне сәйкес, апатқа жеңіл көліктің қарсы бағытқа шығып кетуі себеп болуы мүмкін. Қазіргі уақытта оқиға бойынша сотқа дейінгі тергеу амалдары басталды. Сараптама тағайындалып, апаттың нақты мән-жайы анықталуда.
Жол апатының болған жеріне жедел жәрдем, полиция және төтенше жағдайлар қызметі дереу жеткен.
