Еуропаның танымал лоукостері Wizz Air 2025 жылдың 1 қыркүйегінен бастап Абу-Дабидегі операциялық қызметін толық тоқтататынын хабарлады, деп хабарлайды Todayinfo.
Авиакомпания өкілдерінің айтуынша, Таяу Шығыстағы геосаяси жағдайдың тұрақсыздығы мен жеткізу тізбегіндегі шектеулер олардың жұмыс жоспарына кедергі келтірген.
«Болып жатқан шектеулер мен нарықтарға шектеулі қолжетімділік жоспарымызды жүзеге асыруға кедергі келтірді», – деді Wizz Air бас директоры Йожеф Варади.
Қазақстан бағыттарына да әсер етеді
Wizz Air-дің Қазақстанмен әуе қатынасы тек Абу-Даби арқылы жүзеге асып келген. Сондықтан компанияның бұл шешімі ел аумағынан ұшатын барлық рейстердің тоқтауына алып келеді.
Қазіргі қатынап жатқан бағыттар:
-
Алматы – Абу-Даби: күнделікті рейс
-
Түркістан – Абу-Даби: аптасына үш рет (дүйсенбі, сәрсенбі, жұма)
Осы бағыттардың барлығы 2025 жылдың 1 қыркүйегінен бастап тоқтатылады.
Астанадан рейстер бұған дейін тоқтатылған
Еске салайық, Wizz Air 2025 жылдың маусым айының ортасында Астана – Абу-Даби бағыты бойынша рейстерді тоқтатқан болатын. Негізгі себеп ретінде сол кезде де аймақтағы қауіпсіздік тәуекелдері мен тұрақсыздық аталған.
Өзбекстан, Қырғызстан, Иордания рейстері де қысқарды
Wizz Air тек Қазақстанмен ғана емес, сондай-ақ Өзбекстан, Қырғызстан, Израиль және Иордания елдеріне бағытталған рейстерін де тоқтату туралы шешім қабылдады.
Компания басымдықты Еуропа нарығына береді
Абу-Даби бағытын жапқаннан кейін Wizz Air өз ресурстарын Орталық және Шығыс Еуропаға, сондай-ақ Аустрия, Италия және Ұлыбритания сияқты негізгі нарықтарға бағыттамақ.
