Құқыққорғаушы және БҰҰ еріктісі Ләззат Рақышева өзінің әлеуметтік желідегі парақшасында Түркістан облысы, Отырар ауданында 9-сыныпта оқитын қыздың жүкті болғанын жазды, деп хабарлайды Todayinfo ақпараттық агерттігі.
Оның айтуынша, бұл іске күдікті ретінде төрт адам тартылған: олардың бірі – 11-сынып оқушысы, қалған үшеуі – ересек адамдар.
Түркістан облыстық полиция департаментінің ресми мәлімдемесіне сәйкес, кәмелетке толмаған туысына қатысты құқыққа қайшы әрекет жасалғаны туралы Отырар ауданы тұрғынынан арыз түскен. Аталған факт бойынша тергеу амалдары жүргізіліп жатыр. Қазіргі таңда сараптамалар тағайындалған, істің мән-жайын толық анықтауға бағытталған тергеу жұмыстары жалғасуда.
Полиция жүргізген тексеріс нәтижесінде әлеуметтік желіде таралған бірнеше адамның қатысы бар делінген құқыққа қайшы әрекеттер мен жүктілік туралы деректер расталмаған. Тергеу барысында мұндай мәліметтердің шындыққа жанаспайтыны анықталған.
Түркістан облыстық полиция департаменті Қылмыстық-процестік кодекстің 201-бабына сәйкес, тергеу мүддесі үшін басқа ақпараттың жария етілмейтінін ескертті. Сонымен қатар, жалған ақпарат таратқаны үшін қылмыстық жауапкершілік қарастырылатынын еске салып, азаматтарды тек ресми дереккөздерге сенуге шақырды.
