14 шілде күні сағат 18:10 шамасында Алматы қаласының Алатау ауданында бірнеше көлік қатысқан ауыр жол-көлік оқиғасы орын алды. Оқиға салдарынан 23 адам зардап шекті,деп хабарлайды Todayinfo ақпараттық агерттігі.
Алматы қалалық Полиция департаментінің мәліметінше, МАЗ жүк көлігінің жүргізушісі Бұрындай тас жолымен шығыс бағытта келе жатып, рөлге ие бола алмай, алда келе жатқан Mercedes пен Kia көліктерімен соқтығысқан. Жүк көлігі кейін қарсы қозғалыс жолағына шығып кетіп, Yutong жолаушылар автобусы мен Subaru жеңіл көлігімен қақтығысқан.
Жол апаты салдарынан түрлі жарақат алған 23 адам медициналық мекемелерге жеткізілді. Олардың арасында автобус жолаушылары мен Kia көлігінің жүргізушісі де бар. Дәрігерлер олардың жағдайын анықтап жатыр.
Қазіргі таңда жол-көлік оқиғасы бойынша сотқа дейінгі тергеу амалдары басталды. Полиция оқиғаның нақты себептерін анықтауға бағытталған шаралар жүргізіп жатыр. Жол апатының мән-жайы толық тексерілуде.
