Астанада өтіп жатқан Перизат Қайраттың ісіне қатысты сот отырысында Газа секторына арналған гуманитарлық көмек мәселесі қаралды. Істе жәбірленуші ретінде танылған «Асар-Уме» қайырымдылық қорының президенті Асхат Нұрмашев сотта екі қор арасындағы әріптестікке қатысты деректерді баяндады,деп хабарлайды Todayinfo.
Нұрмашевтың айтуынша, 2023 жылдың қарашасында Таяу Шығыстағы жағдай шиеленіскеннен кейін «Асар-Уме» қоры Газа халқына көмек ретінде қаражат жинай бастаған.
Бес күн ішінде қазақстандықтар 293 млн теңге көлемінде қайырымдылық жасаған. Оның 200 миллионы «BizBirgemiz Kazakhstan 2030» қорына бір траншпен аударылған.
«Бастапқыда қаражатты кезең-кезеңімен, әр жолы 50 млн теңгеден аудармақ едік. Бірақ Перизат барлық соманы бірден аударуды талап етті», – деді Нұрмашев.
Сотта Нұрмашевтің айтуынша, Перизат Қайрат гуманитарлық көмекті Абу-Дабидегі халықаралық хаб арқылы жеткізуді ұсынған. Екеуі бірге Абу-Дабиге барып, қойманы аралағанымен, жүктің нақты барын растайтын ресми құжат ұсынылмаған.
Прокурордың сұрағына жауап ретінде Нұрмашев:
«BizBirgemiz» қорының логотипі бар қораптарды көрмедім, басқа қор өкілдерін де байқамадым», – деді.
Ол сондай-ақ, сатып алынған тауарлар туралы құжаттар да көрсетілмегенін, кейін ұсынылған құжаттардың жалған екенін білгенін айтты.
Бұған дейін «Асар-Уме» қоры ашықтықтың болмауы, қаражатты дұрыс пайдаланбау және балаларды PR мақсатында қолдану бойынша сынға ұшыраған болатын. Қор өз кезегінде мұны ақпараттық шабуыл деп атады.
