Өзін IT-ағартушы, медиа сарапшы деп таныстыратын маман Тимур Бектұр абитуриенттер мен олардың ата-аналарына маңызды кеңес берді. Ол қоғамда кең таралған «жылтыр» мамандықтарға жаппай қызығушылықтың салдары мен шынайы өмірге қажет, бірақ елеусіз қалып жатқан мамандықтарға назар аударуға шақырды, деп хабарлайды Todayinfo.
Cоңғы онжылдықта қоғамда «digital marketing», «блоггерлік», «IT», «менеджмент» сияқты «жылтырақ» мамандықтар сәнге айналды. Алайда Тимур Бектұр бұл үрдістің қауіпті жағына назар аудартады:
«Мектепті енді ғана бітірген, өмір көрмеген, еңбек нарығын білмейтін бала қалай бірден маркетинг менеджер болып шығады? Ақшаны басқармақ түгіл, миллион теңгені қолына ұстап көрмеген адамды бастық етіп кім жұмысқа алады?», — дейді ол.
Маманның пікірінше, басқарушылық мамандықтар – бір мекемеде тәжірибе жинаған, енді теориялық білімді толықтыру қажет екенін сезінген, өмірді көрген ересек адамдар үшін лайықты.
Көзге түспейтін, бірақ қоғамға ауадай қажет мамандықтар
Тимур Бектұр жастарға және ата-аналарға басқа да маңызды мамандықтарды елемей қалмауға кеңес береді:
- Су шаруашылығы
- Монтер, слесарь, токарь
- Орман, теңіз салаларындағы мамандықтар
Бұл бағыттарда маман тапшы. Елдің болашағы үшін аса маңызды салаларда кадр жетіспейді. Бірақ қоғамда олар әлі де «жылтыраған» мамандықтармен салыстырғанда екінші қатарда қалып отыр.
Дене шынықтыру пәнінің болашағы зор
Тимур Бектұр ерекше атап өткен тағы бір бағыт – дене шынықтыру мұғалімі мамандығы.
Қазіргі таңда бұл мамандыққа қызығушылық төмен, бірақ ол болашақта ең табысты және сұранысқа ие мамандықтардың біріне айналуы мүмкін.
«Қазір ересектер де, балалар да жеке тренер іздеп жүр. Адамның дене бітіміне сай арнайы жаттығу ұсынатын, денесін қалыпқа келтіретін білікті мамандар жетіспейді», — дейді Бектұр.
Өз тәжірибесінен мысал келтіре отырып, Астананың өзінен үш ұлына атқа міну, садақ ату, түзу жүру, турникке асылу, жаттығу жасауға машықтану, т.с.с. үйрететін лайықты лагерь таба алмағанын жеткізеді.
Сұлулық пен денсаулық – жаңа тренд
Қазір қоғамда әйелдердің де, ерлердің де сымбаттылыққа ұмтылысы артты. Ал салауатты өмір салты мен фитнес бағыты – осы өзгерістің көрінісі.
«Жеке тренер болу үшін университетке барып, 5-10 теңгеге мектепке жұмысқа тұрудың қажеті жоқ. Жұмыс өзінен өзі келеді. Жеке бапкер, топтық жаттығу, онлайн бағдарлама, спорттық лагерь – бәрі сұраныста», — дейді ол.
Дене шынықтыру маманы болғысы келетін қыздар үшін де бұл салада үлкен мүмкіндік бар. Себебі әйелдерге өз жынысындағы тренерлермен жұмыс істеу ыңғайлырақ.
Менеджмент оқысаң – шынымен меңгер
Ал «менеджмент», «маркетинг» оқығысы келетін жастар болса, ол жай ғана дипломмен шектелмей, нақты тәжірибе жинауы тиіс. Тимур Бектұрдың айтуынша, мұндай студенттер:
- «Барып кел, шауып кел» қызметінен бастауы керек;
- Бизнестің ішкі құрылымын толық түсінуі қажет;
- Заң, салық, аналитика, HR, қаржы салаларын бірге игеруі керек;
- Тапсырма берілгенде мәселені көлденең де, тігінен де түсіне алуы қажет.
