Үкімет отырысынан кейінгі брифингте журналистер Премьер-министр Олжас Бектеновке халықтың нақты табысы мен қымбатшылық мәселесін алға тартты, деп хабарлайды Todayinfo агенттігі.
Оның айтуынша, халық табысының өсуі – жаңа жұмыс орындарын құру және өндіріс ашумен тығыз байланысты.
«Экономиканы дамытпай, табысты арттыра алмаймыз. Жаңа өндірістер ашылып жатыр, 2024 жылдың өзінде 190 кәсіпорын іске қосылады», – деді премьер.
Олжас Бектенов алдағы уақытта іске қосылатын кәсіпорындарға білікті мамандар қажет екенін айтты. Оның айтуынша, қазірдің өзінде электронды еңбек биржасында 100 мыңнан астам бос жұмыс орны бар.
«Кәсіпорын басшыларымен сөйлескенде, барлығы маман таппай жатқанын айтады. Әсіресе инженерлер, IT саласының кадрлары жетіспейді. Кейбірі шетелден әкелуге мәжбүр», – деді ол.
Премьер-министр әлеуметтік көмектің тек еңбекке жарамсыз азаматтарға арналатынын атап өтті. Ал еңбекке қабілетті әр адам мемлекет ұсынған жұмыс мүмкіндігін пайдалануы тиіс.
«Мемлекеттің міндеті – азаматтарға жұмыс істеуге мүмкіндік беру. Ал жұмыс істеймін деген адамға жұмыс табылады», – деді Бектенов.
