Астанадағы Қылмыстық істер жөніндегі ауданаралық сотта «BizBirgemiz Kazakhstan 2030» қорының жетекшісі Перизат Қайратқа қатысты негізгі сот процесі жалғасуда. Істе куәгер ретінде танылған блогер Олжас Садық сотта берген мәлімдемесінде өзін медиа бет-бейне ретінде пайдаланғанын айтты,деп хабарлайды Todayinfo ақпарат порталы.
«Газа халқына көмектесу үшін видео түсіріп, жарияладым. Кейін Перизат Қайрат менімен байланысып, Астанада кездесуге шақырды», – деді ол.
Оның айтуынша, жинаған қаражатты күмәнді тараптарға бермей, ЮНИСЕФ-пен келісімге отырып, барлық 83,5 млн теңгені сол ұйымның шотына аударған.
Сотта айтылған мәліметке сәйкес, қаражат аударылған келесі күні блогер Қайратпен бірге Абу-Дабиге ұшқан. Сапар шығындарының барлығын Перизат Қайрат өтеген.
«Біз Rixos қонақүйіне орналастық. Ертеңіне Emirates Red Crescent қорына бардық. Бірақ олардан қаражат келгені туралы еш мәлімет ала алмадым», – деді Олжас Садық.
Куәгердің айтуынша, Перизат Қайрат гуманитарлық көмекті көрсетіп:
«Міне, осының бәрі сіздердің қаражатыңызға алынған», – деп айтқан.
Алайда қаражат қалай Эмираттарға бір күнде жеткені, және тауар сатып алынғаны туралы бірде-бір құжаттың ұсынылмағаны күдік тудырған.
«Барлығы ауызша келісімдермен жүрді. Қайтарылған соң Қайратпен байланыса алмадым», – деді блогер.
Сот отырысында прокурор жинақталған соманы – 83 542 734 теңге екенін нақтылап, азаматтық талапты қолдай ма деп сұрады. Садық:
«Иә. Мен талап арыз бердім. Қаражат қайда бағытталу керек болса, сонда жұмсалсын», – деп жауап берді.
Сол күні сотта «Асар-Уме» қорының президенті Асхат Нұрмашев та жауап берді. Ол қор атынан «BizBirgemiz» қорына 200 млн теңге аударылғанын, бірақ ешқандай қаржылық есеп ұсынылмағанын мәлімдеді.
