Түркістан қаласында интернет-алаяқтық қылмыстары көбейіп келеді. Бұл туралы қала әкімі Әзімбек Пазылбекұлы қала прокуратурасы, мәслихат, полиция басқармасы, зиялы қауым мен ардагерлер кеңесінің өкілдері қатысқан арнайы жиында мәлім етті, деп хабарлайды Todayinfo ақпараттық агенттігі.
Әкімнің айтуынша, цифрлық технологиялардың дамуы азаматтардың өмірін жеңілдеткенімен, бірқатар қауіптерді де бірге алып келуде. Соның ішінде интернет алаяқтары тұрғындардың сеніміне кіріп, түрлі әдістермен олардың жеке деректері мен қаржылық ақпаратына қол жеткізуде.
Ресми деректер бойынша, 2024 жылдың басынан бері Түркістан қаласында интернет-алаяқтыққа байланысты 85 қылмыстық іс тіркелген. 2023 жылы бұл көрсеткіш 116 жағдайды құраған. Ал соңғы үш жылда жалпы саны 400-ден астам дерек тіркелген.
«Алаяқтар көбінесе өзін банк қызметкері ретінде таныстырып, азаматтарды жалған сілтемелерге өтуге итермелейді, ЖСН, банк картасының нөмірі және SMS арқылы келетін құпия кодтарды сұратады. Өкінішке қарай, тұрғындардың цифрлық қауіпсіздікке салғырт қарауы мұндай әрекеттерге жол ашып отыр», – деді Әзімбек Пазылбекұлы.
Қала әкімі тұрғындарды қырағылыққа шақырып, бейтаныс адамдарға жеке деректерді бермеуге үндеді. Әсіресе, жеке сәйкестендіру нөмірі (ЖСН), банк картасының реквизиттері және растау кодтары тек иесіне тиесілі құпия ақпарат екенін ескертті.
Мамандар интернет-алаяқтықпен күресте құқық қорғау органдарының ғана емес, әрбір азаматтың ақпараттық сауаттылығы маңызды екенін айтады. Осыған байланысты әкімдік тарапынан түсіндіру жұмыстары жалғасады.
