Алматы қаласының Түрксіб аудандық сотында әуежайда қызды тұтқынға алу ісі бойынша айыпталған Машрапбек Баратовқа қатысты үкім шықты. Сот процесін жүргізген судья Анар Карашева Баратовтың кінәсі толық дәлелденгенін хабарлады,деп хабарлайды Todayinfo.
Жаза — 11 жыл бас бостандығынан айыру
Сот Машрапбек Баратовты Қылмыстық кодекс талаптарына сәйкес 10 жыл 6 айға бас бостандығынан айырды. Сонымен қатар, 2023 жылғы іс бойынша өтелмеген жаза мерзімі қосылып, барлығы 11 жыл қатаң режимдегі түзету мекемесінде өтеу жазасы тағайындалды.
“Сот барлық ұсынылған дәлелдерді қарап, айыпталушының шын ниетпен өкінуін ескергенімен, оның әрекеттері адамдар өміріне нақты қауіп төндірді. Осыны ескере отырып, оған 11 жыл бас бостандығынан айыру жазасы белгіленді”, – деді судья Анар Карашева.
Қоғамға қауіп және жәбірленушінің жағдайы ескерілді
Соттың айтуынша, айыпталушының әрекеті көптеген азаматтардың, соның ішінде балалардың өміріне қауіп төндірген. Сондай-ақ, сот отырысында жәбірленушінің эмоционалдық жағдайы ерекше назарға алынды. Судья атап өткендей, зардап шеккен азаматша оқиғадан кейін ұзақ уақыт өтсе де, әлі күнге дейін психологиялық күйзелісте және сотта көз жасын тыя алмаған.
