Қайырымдылық қаражатын жымқыру ісі бойынша қаралып жатқан Перизат Қайраттың ісіне қатысты сот отырысы уақытша тоқтатылды. Сот отырысының басында айыпталушының анасы – Ғайни Алашбаева өзін жайсыз сезініп, денсаулығына шағым білдірді, деп хабарлайды Todayinfo.
Оның айтуынша, қан қысымы көтеріліп, суық тиген. Осыған байланысты судья сот процесіне үзіліс жариялау туралы шешім қабылдады.
«Қазір жедел жәрдем қызметкерлері сізге медициналық көмек көрсетеді», – деді судья.
Сотта қайырымдылық қаражатын жымқыру фактісі қаралып жатыр. Бұл – су тасқынынан зардап шеккен азаматтарға көмек көрсету мақсатында жиналған қаражаттың жұмсалуына қатысты үшінші эпизод.
Бүгінгі отырыста екі жәбірленуші жауап беріп үлгерген. Тергеу материалдарына сәйкес, бұл эпизодта қазақстандықтар су тасқыны салдарынан зардап шеккендерге көмек ретінде қаражат аударған, алайда ол қаражат мақсатсыз жұмсалған немесе жымқырылған болуы мүмкін.
