Қырғызстанның Ұлттық қауіпсіздік мемлекеттік комитетінің басшысы Қамшыбек Ташиев Бішкектің вице-мэрі Жамалбек Ырсалиевті жұрттың көзінше ұстатып жіберді. Бұл «Тұңғыш» ықшамауданында тұрғындармен кездесу кезінде болған, деп хабарлайды Todayinfo ақпараттық агенттігі АКИpress-ке сілтеме жасап.
Кездесуде қала тұрғындары Жамалбек Ырсалиевтің біраз жер телімі бар екенін, бірақ жалдау ақысын төлемейтінін айтып шағымданған.
Ұлттық қауіпсіздік мемлекеттік комитетінің басшысы Ташиев қала тұрғындары мен Ырсалиевтің өзін тыңдап, содан кейін ҰҚМК тергеушілері тұрғындардың сөзін растағанын айтты.
«6 жылдан бері бұл жерді өз мақсатыңызға пайдаланып келгенсіз. Халық біледі. Сіз мені алдадыңыз… Бірақ халықты алдай алмайсыз. Осында жедел қызметкерлер жұмыс істеді, барлығын тексерді. Сіз бұл жерді 6 жылдан бері пайдаланып келгенсіз, бірақ жалға алу ақысын төлеген жоқсыз. Бір сом да төлеген жоқсыз», – деген Ташиев қарамағындағыларға вице-әкіммен тергеу шараларын жүргізуді тапсырды.
Осыдан кейін Ұлттық қауіпсіздік мемлекеттік комитетінің қызметкерлері вице-мэрді дереу ұстап әкетті.
Жамалбек Ырсалиев бұл қызметке 2024 жылғы 14 мамырда тағайындалған болатын.
