Ахметбек Нұрсила өзінің парақшасында экс-шенеунік Ғалымжан Жақиянов туралы жұрт білмейтін шындықты жариялады деп хабарлайды Todayinfo.
«Дос болып қас болғаннан сақта құдай! Ақбалық апама марқұм «Ақшаның беті қара» деп отырушы еді.
«Ғалымжан мен Төленді құдай айырмаса, адам айырмас» деп айтатындай дос ақ болып еді. Түрме де, қуғындау да айырмаған достарды ақша айырды.
Төленнің үстінен қылмыстық іс қозғауға достарының атынан арыз түсірілді, өмірінің кейінгі жылдарын сотта ақталумен өткізді.
Төлен досымызға бұл соққы ауыр тигені соншама айықпас дертке шалдығып мерзімінен бұрын өмірден озды! Қаншама жыл елден жырақ шетте жүруге шыдағын азамат достардың қиянатына шыдай алмады, реніш іштен жеп қойды.
Мен ортақ дос болған соң мән-жайды жақсы білгендіктен қазір бір-екі ауыз сөзбен «азаматтардың» тірлігіне түсініктеме беріп кетейін
Төлен мен Ғалымжан Моңғолиядан бірге кен орнын алып, кәсіп ашады. Артынан түсініспеушіліктер болып бөлінуге шешім қабылдайды. Ғалымжан Төленнің үлесін сатып алуға сомасын анықтап, қол алысып келіседі. Оны араласып жүрген азаматтардың бәрі біледі, куә болады, жазған қағаздары да бар.
Кейін кен орны сатылған соң кикілжің жалғасып, Ғалымжан беретін соманың біраз бөлігін берген соң «Төленнің бұл компанияға қатысы жоқ, мені алдап соғыпты» деп полицияға Төленге қылмыстық іс қозғауға арыз түсіреді.
1937 жылғы кей қазақтардың қылығын еске түсіре ме?
Ал төменгі суреттегі Тагир Сисенбаев деген «ақсақал» кезінде жоғары соттың төрағасының орынбасары болған, Төленмен бірге депутат, аға дос болған еді, бұл компанияға біраз ақша салған болатын.
Бұл «ақсақал» Ғалымжан жаққа шығып, өзінің барлық байланыстарын қосып Төленнің соңына түседі. Төленге онкология деген диагноз қойылғанда Ғалымжан мен Тагир «ақсақалға» құдайдың зарын қылдым «Жігіттер өкпеге қиса да өлімге қимайтын қазақтың баласымыз ғой, тоқтатыңдар, адамды өлтіресіңдер мына түрлеріңмен» деп. Естімеді.
Төлен қайтыс болғанда топырақ салуға да, көңіл айтуға да жарамады!
Енді Тагир «ақсақал» «Төленнің жұбайы Алма Төленнің заңды мұрагері емес, оның құқығын қуалауға қақысы жоқ» деген арыз түсіріпті.
Көз көріп, құлақ естімеген сұмдықтың куәсі болып жатырмыз.
Тагир «ақсақалға»: «Төленді өз қолыңызбен өлтірдіңіз, енді әйелі мен баласына тоймайтын қу құлқын үшін шабуыл жасап жатқаныңыз алдыңыздан шықпайды деп ойлайсыз ба?» деп достары арқылы хат жазып жібердім! Тоқтайтын түрі жоқ.
Ғалымжан, Тагир «ақсақал»!
«Мәңгілік өмір жоқ қой. «Көшетұғын сай үшін, өлетұғын тай үшін, желке терің құрысып ағайынмен ұрыспа» деген бабаларың! Төленнің жұбайы мен балаларына Төленнің еңбегін беріп, арларыңды тазалаңдар, сол кезде Төленнің аруағы сендерді мүмкін кешірер» деп өтінемін!» деп жазды Ахметбек Нұрсила.
