Назарбаевтың ортаншы қызы Алматыда жалпыға ортақ көшені қоршап, зуәлім ғимарат салып тастаған. Парламент мәжілісінің қос депутаты олигарх Динара Құлыбаеваға тиесілі ғимаратқа келгенмен, оларды күзетшілер ішке кіргізбеді, деп хабарлайды Todayinfo ақпараттық агенттігі.
Депутат Бақытжан Базарбектің сөзінше, жердің аумағы алты гектардан асады.
«Әлмерек деген көше болған, қайда ол? Жер учаскесін қалай жекеменшікке беріп жіберген? Жердің иесі — Құлыбаева Динара Нұрсұлтанқызы», — деді Мәжіліс депутаты.
Көшенің жабылып қалғанын көруге Сергей Пономаренко де келген. Оны күзетші биік қақпадан қайтарды.
«Жерді бергендерді, қол қойғандарды, шешім шығарғандарды жауапқа тарту керек», «масқара, ойына келгенді жасайды, оларға бәрі аз», «сол көше қайтарылсын, Әлмерек көшесін қайта ашса, Әл-фараби көшесі аздап болса да босайды, айналып жүрмейтін боламыз», — деп жазды желі оқырмандары.
