Суретте — Нұралы Әлиев пен Тауман Назарбаев. Бірі — Назарбаевтың ресми немересі, екіншісі — тоқалдан туған ұлы. Бүгінде олар Францияның Канн қаласында өтіп жатқан миллиардерлер балында жүр. Бір адамға арналған билет — 12 мың еуро, ал 12 адамдық VIP-үстел — 200 мың еуро тұрады, деп хабарлайды Todayinfo.
Канн қаласында өткен Knights of Charity қайырымдылық гала-кешінде Назарбаев әулетінің бірнеше мүшесі бір мезетте көрінді.
Назарбаевтың жиен немересі— Нұралы Әлиев пен оның немере інісі, Нұрсұлтан Назарбаевтың ұлы Тауман кештен бірлескен суреттерін жариялап, «қайырлы таң» тіледі. Айта кетейік, Тауман Назарбаев 2005 жылы туған. Ол туралы Нұрсұлтан Назарбаев алғаш рет 2023 жылы «Менің өмірім. Тәуелділіктен бостандыққа» атты кітабында жария жазған еді.
Сол кеште Дариға Назарбаева да бой көрсетті. Оның жанында отырған жас жігіт — Нұралы мен Аида Әлиевалардың ұлы Алан Әлиев және белгісіз бойжеткен болды.
Қонақтар қатарынан Ұлыбритания ханзадасы Эндрюдің бұрынғы жары, Беатрис пен Евгения ханшайымдардың анасы Сара Фергюсон да байқалды.
Аталған жағдайға байланысты журналист Самал Ибраева пікір білдірді.
«Отыз жыл елді уысында ұстаған экс-президенттің ұрпақтары халықтың есебінен байып, енді шетелде “қайырымдылық балдарында” сән-салтанатпен жүр. Қазақстанда мұндай өмір салтын көрсетуден именеді — бет жоқ, ұят жоқ.
Ал осы сәтте Қазақстанда не болып жатыр?
– Салық пен айыппұл күн сайын өсуде,
– Халық әр Kaspi аударымы үшін есеп беруге мәжбүр,
– Коммуналдық тарифтер, азық-түлік бағасы шарықтап барады,
– Жалақы мардымсыз, тұрмыс ауыр.
Назарбаевтар – Каннда, қазақтар – қарыздың астында.
Өкінішке орай, бүгінгі биліктің Назарбаевтарға әлі жетпеді. Осыны мойындауымыз керек», — деп жазды Самал Ибраева.
