Алматы-2 теміржол вокзалында 15 жастағы жасөспірімді жоғары кернеулі ток ұрып, күйіп қалды, деп хабарлайды Todayinfo «Қазақстан темір жолы» ұлттық компаниясының баспасөз қызметіне сілтеме жасап.
Оқиға қалай болды?
Оқиға 19 шілдеде сағат 18:55 шамасында болған. КТЖ мәліметінше, жасөспірім вагонның шатырына өз бетімен шығып, сол жерде жоғары кернеулі токқа түсіп қалған.
«Алматы-2 станциясының кезекші қызметкері 15 жастағы баланың вагонның төбесіне шығып, ток соғып жарақат алғанын хабарлады. Дереу жедел жәрдем шақырылды. Жасөспірім тірі, алғашқы медициналық көмек көрсетілді», – делінген хабарламада.
ҚТЖ: Теміржол – аса қауіпті аймақ
«Қазақстан темір жолы» АҚ ата-аналар мен жасөспірімдерді теміржол қауіпсіздігіне аса мұқият болуға шақырады.
«Теміржол – жоғары қауіпті аймақ. Вагондарға шығу, рельстерде ойнау немесе поездардың жанында жүру – өмірге аса қауіпті. Мұндай әрекеттер ауыр жарақатқа немесе өлімге әкелуі мүмкін», – деп ескертеді компания.
Тергеу басталды
Оқиғаға байланысты қызметтік тексеріс жүргізіліп жатыр. Құқық қорғау органдары мен теміржол қызметкерлері жасөспірімнің теміржол аумағына қалай кіргенін анықтап жатыр.
