Индонезия теңізінде өртенген паромнан аман қалған Абдул Рахмад Агу есімді жолаушы қолындағы баласымен бірге теңізге секіріп, трагедияны тікелей эфирде әлемге көрсетті, деп хабарлайды Todayinfo сайты Anyqtime сайтына сілтеме жасап.
Құтқару кеудешесін киген ол ашық теңізде жүздеген адаммен бірге жан сақтау үшін арпалысып жатқан сәтін Facebook-та жариялады. Қазірге дейін 3 адамның қаза тапқаны анықталды. 150 жолаушы құтқарылған. Алайда кемеде 280 адам болғандықтан, тағы 130 адам іздестіріліп жатыр.
«Көмектесіңіздер, кеме өртеніп жатыр. Бортта әлі адамдар бар!» – деп ұзақ уақыт бойы сөйлеген Абдул.
Ол қолындағы сәбиді құшақтап, өзге жолаушыларды сабырға шақыруға тырысқан. Эфир 28 минутқа созылған. Өрт KM Barcelona VA паромында жексенбі күні күндіз басталған. Алдымен кеменің төменгі бөлігінен қою түтін шығып, артынша жолаушылар үреймен суға секіре бастаған. Құтқару кеудешесін киген адамдардың айқайлап, көмек сұрап жатқан видеолары әлеуметтік желіде тарап кетті.
Кемеден тұтас от шығып, аспанды қап-қара түтін жауып кетті. Экипаж мүшелері жолаушыларға құтқару кеудешелерін киіп, суға секіруге көмектескен. Құтқару жұмыстарына арнайы кемелермен қатар, жергілікті балықшылар мен тұрғындар да жұмылдырылған. Олар өз қайықтарымен адамдарды судан шығарып алған. Өрттен кейін кеменің қаңқасы ғана қалған.
KM Barcelona VA – Талауд аралдарынан Манадо қаласына жолаушылар тасымалдайтын паром. Ол Талисе аралына жақын маңда өртеніп кеткен. Кеме Манадо портына жетуге шақ қалған сәтте өрт тұтанған. Іздестіру-құтқару штабы жақын маңдағы Ликупанг портында құрылды. Жолаушылардың туыстары сабыр сақтап, ресми ақпаратты күтуде.
«Қосымша ақпарат береміз. Ең бастысы – барлық жолаушыларды аман алып қалу», – деді Манадо қаласындағы іздеу-құтқару қызметінің жетекшісі Джордж Ранданг.
Автор: Ерлан Айқынұлы
