Independent Türkçe басылымының дипломатиялық дереккөздерге сілтеме жасай отырып хабарлауынша, Ресей мен Украина арасындағы келіссөздердің үшінші раунды 23 немесе 24 шілде күндері, яғни сәрсенбі не бейсенбіде, Түркияның Стамбұл қаласында өтуі мүмкін,деп хабарлайды Todayinfo.
Басылымның мәліметінше, бұл жолғы кездесу техникалық сипаттағы шектеулі мәселелерге арналмақ. Келіссөз барысында тараптар гуманитарлық көмек көрсету, тұтқындармен алмасу, инфрақұрылым қауіпсіздігі және шекараларды қорғау шаралары секілді маңызды мәселелерді талқылайды.
Ресей мен Украина делегациялары осыған дейін 16 мамыр және 2 маусым күндері де Стамбұлда кездескен болатын. Ол келіссөздер барысында тараптар тұтқындар алмасу бойынша келісімге келіп, бір-біріне меморандум жобаларын ұсынған.
Үшінші кездесу өтетін нақты уақыт, орын және делегациялар құрамы қазіргі уақытта ресми түрде жарияланған жоқ. Бұл ақпараттар қауіпсіздік талаптарына сай құпия сақталуда.
